Laithiangtho Dokna (Micah 3-4)

1. A kuate in Israelte a hingtangin a vun na hawk uh ziam?
a.  A lampuite
b. Babylonte
c. Palestinete

2. Kamsangte in kuate tungah kilemna om tu ci ziam?
a. Jerusalem
b. sum taw a thamte
c. TOPA abealte

3.  Mailam atu a son khol kamsangte sia a ___hu in min sia tu hi.
a. ngaisut khial uh
b. a kiphatsak uh
c. tangtun ngawl

4. Pathian in amate thu zokik ngawl ahiciang amate ki___ tu hi.
a. enthaw tu
b. ngaimaw
c. that

5. Amate in ___ sia tual thana le thutan ngawlna phung tawdap tungah sa uh hi.
a. Jerusalem
b. a upna uh
c. khuapi luphung

6. Banghang lampuite tungah siatna tung ngawl tu ci ngam ziam?
a. Pil kisa
b. TOPA in ompui kisa
c. A thumaan uh hang

7. Mailam hun ah Biakinn dinna mual sia ___hi tu hi.
a. na lamdang pianna
b. a kii huai khat
c. a saangbel mual khat

8. Topa ii hilna sia ___pan hong pai hi, ci tu uh hi.
a. vantung
b. Jerusalem
c. kamsangte tung

9. Amate in a namsaute ___ in seak tu hi.
a. lothawna
b. teipi
c. nau luai khat

10. Jerusalem khuapi ki nusia tu ahikom, ___ kici hi.
a. lungdam vun
b. tau vun
c. kinging vun

11. TOPA in amate koi sungpan atawntung in uk tu ziam?
a. Vantung pan
b. A biakinnpi sung pan
c. Zion mual pan

12. TOPA in a banghang lo ante kaikhop bangin amate kaikhawm ziam?
a. Thupha kibang sak nuam
b. Ki lomh tangh le uk
c. Daan piak sawm



Micah 3
Micah in Israel ii Lampuite Sonsia
1Ngai vun Israel a uk note awng! Note thumaan thutang dei tu hong kingaisun hi, 2hi napi, note in a phate ngaimaw in a siate na it uh hi. Ka mite a hingtangin a vun na hawk uh a, a ngute tung pan a sa na hoai uh hi. 3Ka mite na netum uh hi. A vun hawkin, a ngu thiaktan in an beal taw huan tu sa bangin na saatcip uh hi. 4TOPA tungah na au tu hun hong theng tu a, ahihang ama in hong zo ngawl tu hi. Note thungetna ama in hong ngai ngawl tu hi, banghangziam cile a sia nate na seam uh hi.

5Sum taw a thamte tungah kilemna om tu hi ci in kamciam a, ahihang a tham zo ngawlte tungah ngal om tu ci in a tawng kamsangte in ka mite theam hi. Hi kamsangte tungah TOPA in, 6“Kamsangte awng, na ni uh bo dektak hi; no tungah ni tum tu hi. Ka mite lamlak khial na hi uh ciang kamsaan mu kholnate na nei nawn batu uh a, son khol thei bangma na nei nawn batu uh hi. 7Mailam atu a son kholte a tangtun ngawl hu in min sia tu hi. Amate theampo ki enthaw tu hi, banghangziam cile Pathian in amate thu zo kik ngawl hi.

8Ahihang kei ka hile TOPA in a thaa le a vaangletna taw hong dim a, thutang heak theina le Israel mite tungah amate khialna bangziam ci in son ngamna hanna hong pia hi. 9Thutang ngaimaw in, a maan sia a maan ngawl a sua, no Israel ngam ukte awng, hong ngai tavun. 10Pathian ii khuapi Jerusalem sia tual thana le thutan ngawlna phung tawdap tungah na sa uh hi. 11Khuapi ukte in sumnguk neak natu in uk a, thiampite in thasum neak natu in Thukham phen a, kamsangte in sum nga natu in thu pualaak hi– a vekpi ma in TOPA sia amate taw omkhawm hi citek uh hi. Amate in “Ko tungah siatna hong tung ngawl tu hi. TOPA sia ko taw omkhawm hi,” ci uh hi.

12Tua ahikom note hu in Zion sia lo bangin kitho tu a, Jerusalem sia nin kholna suakin, Biakinn mual sia dui suak tu hi. *

Micah 4
TOPA ii Vannuai Kilemna taw Ukna
1Mailam hun ah
Biakinn dinna mual sia a saangbel mual khat hi tu a,
mualnote theampo tungah dokto tu hi.
Minam tam mamate tua munah
tuiluang bangin hong pai tu a,
2taciang a mite in hi bangin,
TOPA ii mual Israelte ii Pathian Biakinn ah kaato tawng,
Banghang ziam cile
seam a hong oaite ama in hong hil tu hi;
ama teal sa lampi ih zui tu hi.
Banghangziam cile TOPA ii hilna sia Jerusalem pan hong pai hi;
Zion panin ama in a mite paupui hi,” ci tu uh hi.

3Minamte kilaklaw, a nai a khuala a vaangliante kilaklaw a,
a kituu thute ama in lemtua tu hi.
Amate in a namsaute lothawna in seak tu a,
a teipite thingbaak heuna nam sua tu hi.
Minamte ngal kido kik nawn ngawl tu a,
ngal kido kik tu in kingingta nawn ngawl tu hi. *
4A sapit huan le a theikung sungah
mihingte theampo kilem in teang tu hi,
taciang kuama in ama lau sak ngawl tu hi.
TOPA Vaanglianbelpa in hi kamciam pia zo hi. *
5Minam simin amate tek ii pathian bia in a thu ni uh hi. Ahihang eite in TOPA ih Pathian a tawntung a tawntung ih bia tu a, a thu ih ni tu hi.

Saltanna pan Israel Cia kik tu
6TOPA in, “Daan ka piak a, sal in ngim thuak mihingte ka khoptua kik tu hun hong theng tu hi. 7Amate liamin, bai a, inn panin kikhuala hi, ahihang a omlai sunte atu kipat kikna thak khat ka vawt sak tu hi. Amate minam lian khat suak tu hi. Zion Mual tungah amate tua hun pan kipan a tawntungin ka uk tu hi,” ci hi.

8Nang Jerusalem, Pathian ii tuucing bangin a mite a etcikna tausaang, noma neisa kumpi ngam khuapi sia khatvei khuapi suak kik tu hi. 9Banghang a nging tatakin kap nu ziam? Nausuak tun numei khat bangin banghang thuak nu ziam? Kumpi na nei ngawl hang uh le na upate a thi uh hang ziam? 10Jerusalem mite awng nausuak tu numei bangin kisaan in tau vun, banghangziam cile tu in khuapi na nusia tu uh a, ngam sungah na teang tu uh hi. Babylon ah na pai uh kul tu hi, ahizong tua munah TOPA in na ngalte khutsung uh pan hong hun tu hi. 11Minam tam mamate note sim tu in kikhawm zo hi. Amate in, “Jerusalem kisusia nanak tu hi! Hi khuapi a zancip in ih mu tu hi!” ci uh hi. 12Ahihang hi minamte in TOPA ii thin sungah bang om ziam ci in he ngawl uh hi. Lo ante cil tu in a kaikhop bangin amate daan piak tu in a kikaikhop ahi hunlam amate in tel ngawl uh hi.

13TOPA in, “Jerusalem mite awng, pai vun a, na ngalte daan pia vun! Thikkii a nei le taungo peangcin a nei khuital khat bangin kong hatsak tu hi. Note in minam tam mamate na henpeak tu uh a, ngoltol thu taw a nga haunate Keima,leitung buppi ii TOPA nong pia tu uh hi,” ci hi.

0 comments:

Post a Comment