Laithiangtho (Ezekiel 13-14)

1. Ezekiel 13 sung kamsangte bangbangh hi ziam?
a. TOPA deina zong
b. Ngimhngaa
c. Thu Phuaktawm

2. Kamsangte in Israelte bang ba ci ziam?
a. TOPA in hong hun tu
b. Ngual ki lel tu hi ci
c. Na theampo pha hi ci

3. Leilot kamsangte in luphung sia bang taw zuut uh ziam?
a. Tuuno chisan
b. Suangkaangtui
c. Vuttui

4. Leilot kamsangte in bang adeina taw TOPA maimawl sak ziam?
a. Maangtaang tawm le anluum
b. Kham le nguun
c. Sum tang

5. Banghang bum le ai taw a kivawt khut tuamnate khui uh ziam?
a. Kaam phat natu
b. Baal pathian sawlna
c. Thunei thei natu

6. Mihing phate in banghang thin kiam ziam?
a. Ngalte tam lei
b. TOPA in tai san
c. Leilot thu hang

7. Israel lampuite pawlkhat Ezekiel kungah bang dongh tu in haw ziam?
a. Ngal zaw tu le lelh tu
b. TOPA ii deina
c. Kumhpi pa nuntakna vai

8. Israelte in TOPA ii ___ taw thumaanna ngaa tu in kilamen hi.
a. zokikna
b. piak thahatna
c. piak ciimna

9. TOPA in "hong heak kik tavun a, ___milimte nusia vun" ci hi.
a. Baal
b. na vawt tawm
c. a kiihuai

10. Noah, Daniel, Job, te zongh ___ in amate nuntakna bekma suatak bek tu uh hi.
a. amate
b. amate thungetna
c. amate phatna

11. A zak dialte sia ___ taw a kivawt hi.
a. tuumul
b. bum le ai
c. nailung

12. Jerusalem tungah ngimna nasia bel nam ___tung sak tu khi hi.
a. 4
b. 7
c. 12



Ezekiel 13
A maan ngawl Kamsangte atu Son kholna
1TOPA in hong paupui hi. 2Ama in, “ A thi thei mihing awng, amate phuatawm kamsaanna a son Israel kamsangte nalh in. TOPA kammalte a ngai natu in amate sawl in,” hong ci hi.

3Hi sia sia Vaanglianpipa TOPA ii ci ahi hi. “Hi a mamaw kamsangte a lal hi zo hi! Amate in a ngaisut tawm thu bek sonin mu kholnate phuak tawm uh hi. 4Israel mite awng, na kamsangte uh sia khuapi lalcipna sungah a teang ngiate bangma in mannung ngawl hi. 5Amate in luphung cimhna munte cing ngawl a, ciang zongh ciang kik ngawl hi. Tua ahi ciang, Israelte sia TOPA ii ni, ngal hong thet ciang kihung thei ngawl tu hi. 6Amate mu kholna sia maan ngawl a, amate son kholnate sia leeilot thu hi. Amate in kei kam vaithak hi ci in son ahihang, keima in amate sawl ngawl khi hi. Tua hi napi in, amate in amate kammalte tangtung tu in a um lalai uh hi. 7Amate munah ka ci hi. Na mu khol uhte sia a theam hi. Son kholna na son uhte sia leeilot thu hi. Tuate sia kei kammal in na nei uh hi. Ahihang no tungah kei hong son ngawl khi hi”.

8Tua ahikom Vaanglianpipa TOPA in amate tungah “Na kammal uhte sia a theam thu hi a, na mu kholna uhte sia leeilot thu hi. No hong langpan khi hi. 9A maan ngawl mu kholna a neite le lampialna tu son kholna a nei no kamsangte daan kong pia tu hi. Thukhen tu in ka mite a kikhop ciang, tua munah na om batu hi. Israel minamte sazian sungah na min uh a kihel batu hi. Na ngam uh ah, na heak kik ngei batu uh hi. Tasia ciangin kei sia Vaanglianbel TOPA ka hi hunlam na he tu uh hi.

10“Kamsangte in ka mite sia na theampo pha hi ci in lampial sak uh hi. Na theampo pha siat ngawl hi. Ka mite in luphung sia suangtum hon khat taw a kawmin ciang a, taciang kamsangte hong pai in, tua pang sia suangkaangtui taw zut in, seal hi . 11Luphung cimhtham dektak ci in, kamsangte son vun. Buak bangin ngua ka zu sak tu a, a tungah ngialtangte hong kia tu a, vuipi thahat khat in seam tu hi. 12Luphung sia topcip tu hi. Mihing theampo in, suangkaangtui ii kimanna sia bang ziam ci in nang hong dongh tu uh hi,” ci hi.

13Tu in hi sia sia Vaanglianpipa TOPA ii pauna hi. “Ka thin uukna taw luphung susia tu in, vuipi thahat khat, bing le beal sun bangin ngialtangte ka puak tu hi. 14Amate ii suangkaang tui taw a zut luphung sia vaat thap sak tu, saat thap tu le a phungkawng suangtumte bek kheet sak lai tu ka sawm hi. A luphung sia cimhtham tu a, note theampo hong dellum tu hi. Tasia ciang a kuama po in kei sia TOPA ka hi hunlam hong he tu uh hi.

15“Luphung le tua luphung suangkaangtui taw a zutte in ka thin uukna ii thahatna a thuak tu uh hi. Tasia ciangin, tua luphung bo zo a, tasia bangma in suangkaangtui taw a zutte zongh bo siat zo hi, ci in nang kong son tu hi. 16Na theampo a phat ngawl laitakin, pha siat hi ci a Jerusalem tungah thupha a son kamsangte sia bo siat zo hi,” Vaanglianpipa TOPA in son zo hi.

A Maan ngawl Numei Kamsangte atu Son kholna
17TOPA in, “Tu in a thi thei mihing awng, na mite sungah mailam thupiang tu a sonkhol numeite en in. Tuate nalh in. 18Tasia ciang, Vaanglianpipa TOPA in, amate tungah bang ci ziam ci sia amate tungah son in,

“No numeite a bo hi uh te! Note in midangte nuntakna ii tungah thu na nei thei natu uh in, a kuama theampo atu in, bum le ai taw a kivawt khut tuamnate na khui sak a, a kuama po ii lu tungah a khip tu in, bum le ai taw a kivawt dialnote na vawt sak uh hi. Ka mihingte tungah thina le nunna vaang na nei nuam uh a, tua vaang sia noma phattuamna tu bek in na zangh nuam uh hi. 19Mangtaang tang tawm le anluum na deina uh in, ka mite mai ah ka mai hong mawl sak nu hi. Thi tu a, a kilawm ngawl mihingte na thatlum uh a, nungta tu a kilawm ngawl mihingte na nungta sak uh hi. Tua ahikom in, ka mite tungah leeilot thu na son uh a, amate in hong um uh hi,” ci hi.

20Tu in hi sia Vaanglianpipa TOPA ii ci teng ahi hi. "Thina le nuntakna tungah thu na nei nopna uh hangin, na zak uh khut tuamnate ngaimaw khi hi. Na baante uh panin ka laaikeak tu a, na uk sung mihingte ka suakta sak tu hi. 21Na dialno uhte ka baltham tu a, ka mite na vaangletna pan a tawntung atu in, khatvei ka suakta sak tu hi. Taciangin, kei sia TOPA ka hi hunlam na he tu uh hi.

22Mihing phate ka liam sak nop ngawlte, na leeilotna taw a thin uh na kiam sak uh hi. Mihing khansiate a siatna uh a nusiat tu uh le, a nuntakna uh a kihukna tu pan na khak tan uh hi. 23Tua ahikom, tu in na mu kholna a maan ngawlte le lam hong pial sak son kholnate bo zo hi. Keima, TOPA ka hi hunlam na heak natu in na vaangletna pan ka mihingte ka suatak hi,” ci hi.

Ezekiel 14
Pathian in Milim Biakna Ningkhiin
1Israel lampuite pawlkhat TOPA ii deina dongh tu in hong haw hi. 2Tua zawkciang in TOPA in kei hong paupui hi. 3Ama in, “A thi thei mihing awng, hi mite in a thin uh sia milimte pia zo a, milimte in, amate mawna sungah thet pui hi. Amate in hong thu dokte zo kik tu in hong um ziam?

4“Tu in amate tungah, Keima, Vaanglianpipa TOPA in, bang ci khi ziam ci sia son in: Israelte milim tungah a thin a pia peuma le mawna sung a thetpui zawkciang, kamsangte thu a dongh te in, kei tung pan ka zo kikna na nga tu hi– tua in milimte taw a kiphu zo kikna hi tu hi. 5Tua milimte in Israelte sia kei kung pan lampial sak hi; ahihang ka zo kiknate taw amate ii thumaanna nga kik tu in ka lamen hi.

6Tua ahikom tu in, kei Vaanglianpipa TOPA ii Israelte tungah ka ci teng son in: hong heak kik tavun a, a kiihuai milimte nusia vun.

7“Israelte khat po ahizong, Israel mihingte sungah a teang ngamdang mi khatpo in, kei kung pan lampial in, milimte bia a, tua zawkciang, kamsangte thu a dongh le Keima, TOPA in ama thu dokte ka zo kik tu hi. 8Ama ka langpan tu hi. Ama sia ngual ii ettee tu in ka koi tu hi. Ama sia ka mihonpite kawm panin, Kei, TOPA ka hi hong heak natu in ka heam tu hi.

9Kamsang khat in theam thuakin, a maan ngawl zo kikna a pia le Kei, TOPA in ama theam ka hi hi. Israel mite kawm panin ama ka heam tu hi. 10A kamsangpa le a dongh pa sia daan a kibangin nga tu hi. 11Israelte in kei hong taisan ngawl natu le a khialna uh taw amate le amate a kinin sak ngawl natu in hi bangin ka vawt tu hi. Amate in ka mihingte hi tu a, Keima in amate Pathian ka hi tu hi,” Vaanglianpipa TOPA in son zo hi.

Noah, Daniel le Job
12TOPA in kei hong paupui a, 13“A thi thei mihing awng, ngam khat in khial a, kei tungah hong thumaan bale, ka khut ka vaan tu a, a ngam ii a an ngana lampi sia ka susia tu hi. Kialpi ka tung sak tu a, mihing le ngannote a kibangin ka thatlum tu hi. 14Noah, Daniel, Job, mihing thumte tua munah a teang hial zong, amate phatna in amate nuntakna bekma suatak bek tu uh hi,” Vaanglianpipa TOPA in son zo hi.

15“Tua ahibale ngamsa ngilote ka pai sak tu a, mihingte thatin, kuama ngamsung khual a haw ngam ngawl dongin ka lauhuai sak tu hi. 16Tua mihing thumte keak tua munah a teang hial zong, Kei Vaanglianpipa TOPA sia a nungta Pathian ka hi bangma a tate uh zongh a hun zo batu uh hi. Amate nuntakna bek kihung zo tu a, a ngam sia duipui suak tu hi.

17“Tua ahibale, ngal ka theng sak tu a, a lal sak thei ngalhiamte taw mihingte le ngannote a kibangin ka maaimot sak tu hi. 18Tua mihing thumte keak tua munah a teang zong, Keima, Vaanglianpipa TOPA sia a nungta Pathian ka hi bangma in, a tate uh zongh, a suatak zo batu uh a, amate nuntakna bek a hu zo tu uh hi.

19“Tua ngamah a kilaw thei natna tung sak in, ka thin uukna taw nuntakna tam mama la in, mihing le ngannote ka thalup ciang, 20Noah, Daniel le Job te keak tua munah a teang zongin, Keima, Vaanglianpipa TOPA sia a nungta Pathian ka hi bangma, amate in a tate zongh, a hun zo batu uh hi. Amate phatna in amate nuntakna bek a hung zo tu uh hi,” ci hi.

21Hi sia sia Vaanglianpipa TOPA ii pauna ahi hi, ‘Jerusalem tungah ngimna nasia bel nam li tung sak tu khi hi. Ngal, kialpi, ngamsa ngilote, le natna te in mihingte le ngannote a kibangin susia tu uh hi. 22A suakta khatpo om a, a tate a suatak le na kungah hong pai ciang, en ka po in. Amate bangzata sia in, ngilo ci sia na mu ziam? Taciang Jerusalem tungah ngimna ka piakte sia bangza in piak tuak ziam ci sia tel in; 23tasia ciangin na ka vawt peuma sia a hang om ci sia na tel tu hi,” ci in Vaanglianpipa TOPA in son zo hi.

0 comments:

Post a Comment