Laithiangtho (Kumpite Niina 19-20)

1. Hezekiah maan sung thiampi lian aseam sia kua ziam?
a. Isaiah
b. Jeremiah
c. Amos

2. Assyria kumpipa ii laithak angaa ciang Hezekiah bang hi ziam? 
a. Meeting sam
b. Biakinn pai in thungen
c. Lai-atpa kung ah pai

3. Hezekiah ii thungetna ah Pathian ii tokhum sia ___ ci hi. 
a. Vantung
b. Meikhuamte
c. Cherubim te ii tung

4. Pathian  in“Sennacherib awng ___ in nang hong nunau hi” ci hi. 
a. Mihingte
b. Israelte
c. Jerusalem 

5. A kua in “na kam kamkhau kong bul tu a, kong leekai kik tu hi,” ci ziam?
a. Assyria kumpipa
b. Babylon kumpipa
c. Pathian

6. TOPA ___ pai in Assyria te 185,000 thatlum hi.
a. vantung lalang honte
b. vaangletna
c. vantung lalang khat

7. Isaiah ii pa sia akua ziam? 
a. Jetro
b. Elishea
c. Amoz

8. Hezekiah adam kik zawk nibangza ciang Biakinn pai tu ziam? 
a. Ni khat
b. Ni thum
c. Ni sali

9. Pathian in Hezekiah ii kumh bangza khangkhan ziam? 
a. 15
b. 12
c.  7

10. ___tungah TOPA in nilim sia kal sawm nungkin sak kik hi.
a.  keallei 
b. Biakinn 
c. Kumpi inn kong

11. Hezekiah in anei alamh theampo akuate lak ziam? 
a. Babylon te
b. Assyriate
c. Egyptte

12. Hezekiah in khuapi ii tuineak tu bangbangh vaihawm ziam? 
a. Leihawng to let
b. Tuikhuuk tam tatak vawt
c. Luam khat vawt


Kumpite Niina 19-20

Kumpite Niina 19

Kumpipa in Isaiah Thu dongh

(Isaiah 37:1-7)
1Kumpipa Hezekiah in amate ii thu kona a zaak po ciang a puansilh lai eaukeak in, khau-ip puan a silh zawkciang Biakinnpi sungah tum hi. 2Ama in kumpi inn a keam pa Eliakim, zum lai at pipa Shebna le thiampi lian pa sia Amoz ii tapa Isaiah kamsangpa kungah puak hi. Amate theampo zongh khau-ip puan silh uh hi. 3Amate ii Isaiah tungah kammal thaak tu a piak sia hi teng hi. “Tu ni sia haksatna ih thuak ni hi; ei sia hong kidaantat a, hong kimai mawl sak hi. Ei sia numei khat nau suak tu tha mama nei ngawlin a suak zo ngawl taw ih kibang hi. 4Assyria ngam uk lianpa in ama ii ulianbel pa a nungta Pathian lang zazan tu in hong pai sak hi. Na TOPA Pathian in hi lan zazan nate za hen a, tabang a paute daan pia hen. Tua ahikom Pathian tungah ih mihingte a luhai lai teng atu thu ngen in,” ci uh hi.

5Isaiah in Kumpipa Hezekiah ii kamthaak teng a nga ciang, 6ama in hi zo kikna teng thaak kik hi. “TOPA in Assyriate ii TOPA in hong hun thei bo a ci khawng te in lauthawn sak heak vun. 7TOPA in ngam uk lianpa sia kamleang khat za sak tu a, a ngam ah cia sak kik tu hi, TOPA in ama tua munah kithat lum sak tu hi,.” ci hi.

Assyriate in Tawnna Dang khat thaak
(Isaiah 37:8-20)
8Assyria ulian pa in ngam uk lianpa sia Lachish khua nusia in a nai na Libna khuapi ah ngaldo hi ci in za hi; tua ahikom ama in ama taw kamkum tu in pai hi. 9Assyriate in thu za a, Egyptte ngalkap honte Ethiopia kumpipa Tirhakah in lampui in amate sim tu hi ci in za uh hi. Ngam uk lianpa in hi thu a zaak ciang ama in Judah te kumpipa Hezekiah lai khat thaak hi. 10“Na muanna Pathian in nang sia kei khut sungah taak ngawl tu ni hi hong ci hi, ahihang tua in nang theam sak heak in. 11Assyria ngam uk lianpa khat in ama ii siat sak nop ngam khat papo sia bang law ziam na zaak sa hi. Nang suakta thei tu ki um ni ziam? 12Ka pute in khuapite ahi Gozan, Haran le Rezeph te susia a, Telasar a teang Bethedan mite zongh mon hi, amate ii pathiante in hun thei ngawl hi. 13Hamath, Arpad, Sepharvaim, Hena le Ivvah khuapi te ii a kumpipate koi sungah om ziam?” ci hi.

14Hezekiah in a laithak la in sim hi. Tua zawkciang ama Biakinnpi sungah tumin TOPA ii ompuina ah laithak sia koi hi, 15taciang thu ngen hi. “Cherubim te ii tungsia na tokhum tungah a to, TOPA Israelte ii Pathian awng, nang bekma Pathian na hi hi, leitung kumpi ngam theampo a uk pa na hi hi, nangma in lei le van na bitphua hi. * 16Tu in TOPA awng, ko tungah thu hong piangte en in. Nang a nungta Pathian hong selnona Sennacherib ii pau teng ngai in. 17Ka vekpi in he khu hi, TOPA Assyria te ngam uk lianpa in ngam tam mama susia a, a leitangh te ngamkhing in om sak hi, 18taciang a pathian uh te haltham hi, tua pathiante sia pathian hi ngawl hetin, thingngel suangngel mihing khut taw ma in a kivawt ahi hi. 19Tu in, TOPA, ka Pathian awng, Assyriate kung panin hong hun tan, tasia ciang leitung ngamte theampo in nang, TOPA bek Pathian na hi hunlam hong he tu hi.”

Kumpipa tungah Isaiah ii Kamthaak
(Isaiah 37:21-38)
20Tua zawkciang Isaiah in Kumpipa Hezekiah kam thaak a kumpipa ii thungetna Pathian ii zo kikna 21TOPA ii ci teng, “Sennacherib awng Jerusalem khuapi in nang hong nuisan hi, hong nunau hi. 22Nang in akua lang a, akua selno ni ziam? Nang in kei, Israelte ii a thiangtho Pathian sia nong zatak vawt bua hi. 23Na kamtai te na pai sak a, kei tungah kisuangtaak in, na ngalleangte taw Lebanon mualsaang bel te na zo hi. Nang in cedar saangbelte le cypress thing phabelte ka phuktan a, taam sung a thuk belna mun ka theng hi ci in na kisuangtaak hi. 24Ngamdang ah tuikhuk to in tui ka dawn hi na ci a, na ngalkapte in Nile Ngun tuan ko hi ci in na kisuangtaak hi.

25“Hite sia khua ngeipi lai in ka ngeal sa ahi hunlam za ngei ngawl ni ziam? Tuciangin tua ka ngealna te taksua suak hi. Khuapi lian kulh taw a ki uumte suangtum hon suak sak tu in thahatna kong pia hi. 26Tua mun ah a teang mihingte sia thahatna nei ngawl hi; amate sia lau in khing uh hi. Amate sia lo sungah lopate ahibale innkhuam tunga nisuana pan vuisa ii seam keak lopa te bang hi lel hi.

27“Ahihang nang huvau na theampo hong he khi hi, bang vawt a koi sungah pai, ci in kong he hi. Kei langpan in na kitom ngawp kong he hi. 28Tua na kitomna te hong kikona ka nga a, na kiphat sakna hong kikona te zongh ka nga hi, tu in na naak sungah thikkoai kong thaak tu a, na kam sungah kamkhau kong bul tu a, na paina lampi sia ma tawnin kong leekai kik tu hi,” ci hi.

29Tua zawkciang Isaiah in Kumpipa Hezekiah munah, “Hong piang tu thu ii lim sia hi sia hi. Tu kum le mai kum ciangin ngamh antangte bek na ne tu uh hi, ahizong a kum kik ciang na ciin sa uh ante na at tu a, na suan sa uh sapit ngate na ne tu hi. 30Judah a luhai in a omlai teng sia thingno bangin khang tu a, lei ah zung thuk tha in, a ngate nga tu hi. 31Jerusalem ah mite om tu a, Zion Mual ah zong a luhai in om tu hi, banghangziam cile TOPA in hisia a pian natu sia kho ngaisut hi.

32Assyria ngam uk lianpa huvau TOPA ii ci sia hi sia hi: Ama in hi khuapi sungah tum ngawl tu a, thaltang khat zongh hi khuapi ngatin kap ngawl tu hi. Lum toai ngalkap khat zongh hi khuapi hong neak ngawl tu a, taciang uumci natu a kiim ah leivum khat zongh kivawt ngawl tu hi. 33Ama hong paina lampi ma tawnin heak kik tu hi, hi khuapi sungah tum ngawlin heak kik tu a, Keima, TOPA in pau zo khi hi. 34Keima min taw upatna le ka naseampa David tungah ka kamciam sa bangin hi khuapi sia dal in hung tu khi hi.

35Tua ni zanin TOPA vantung lalang khat pai in Assyria te 185,000 thatlum hi. A zingsang khuavak ciang amate a thi sa in liik hi! 36Tua zawkciang Assyria te ngam uk lianpa Sennacherib nungkin in Nineveh khua ah heak kik hi. 37Ni khat ni in ama biakinn sungah a pathian Nisroch bia in a om laitak a tapate nii, Adrammelech le Sharezer te in a namsau uh taw thatlum hi, taciang amate Ararat ngam ah suakta uh hi. A tapate a dang khat Esarhaddon in ngam uk lianpa za lua hi.

Kumpite Niina 20

Hezekiah Kumpipa ii Natna le Dam kikna

(Isaiah 38:1-8; 21-22; 2Khang tangthu 32:24-26)
1Hi hun sung khawngin Kumpipa Hezekiah sia a ciina in hong thi dektak hi. Amoz ii tapa, Kamsangpa Isaiah in ama taw kimu tu in pai a, ama munah, “TOPA in, na theampo ahi tu bangin koi in, banghangziam cile dam kik ngawl tu ni hi. A thi tu kinging in,” ci hi.

2Hezekiah in a maitang pang sang nga in thungen hi: 3“TOPA awng na phawk in, nang tungah thumaanna taw seam a nong oai theampo seam khi hi,” ci hi. Ama in nasia takin kap tu in hong kipan hi.

4Isaiah in kumpipa paisan a, ahihang kumpi inn leitual a kantan laitakin TOPA in ama munah, 5TOPA in ama munah a minamte a ukpa Hezekiah kungah pai kik in sawl a, “Kei, TOPA, na pu David ii Pathian in na thungetna kong za a, na thitui luan ka mu hi. Hong dam sak tu khi hi, taciang tu zo ni thum ciangin Biakinnpi sungah pai tu ni hi. 6Kum sawm le kum nga hong nungta sak lai tu khi hi. Assyria te ii ngam uk lianpa khut sung pan nang le hi khuapi Jerusalem sia hong hun tu khi hi. Keima ka ki upat natu le ka naseampa David tungah ka kamciam vawt hu in hung tu khi hi,” ci in son sak hi.

7Tua zawkciang Isaiah in kumpipa a ou te munah thei nga panin a kivawt noi thei khat a uilut noai leute dam tu hi, ci in sawl hi. 8Kumpipa Hezekiah in, “TOPA in hong dam sak tu a, ni thum ciangin Biakinnpi ah ka pai thei tu sia bang lim taw tel tu khi ziam?” ci in dongh hi.

9Isaiah in zo a, “TOPA in a kamciam tangtung sak tu hi ci in hong lakna in lim khat hong pia tu hi. Tu in keallei tungah niliap ii lim sia kal sawm a mai sangah pai sak nuam zaw ni ziam, a nung sangah kal sawm nungkin sak nuam zaw ni ziam?” ci in dongh hi.

10Hezekiah in, “Nilim liap mai ah kal sawm pai tu sia thu ol hi. Kal sawm nungkin sak in,” ci in zo hi.

11Isaiah in TOPA tungah thungen a, Kumpipa Ahaz ii vawt keallei tungah TOPA in nilim sia kal sawm nungkin sak kik hi.

Babylon pan Kamtaite
(Isaiah 39:1-8)
12Tua hun khawng ma in Babylonia kumpi ahi Baladan ii tapa Merodach Baladan in Hezekiah kumpipa sia a ciina hi ci in za a, tua ahikom ama in lai thaak khat le letsong khat thaak hi. 13Hezekiah in tua kamtai te pha takin saang a, taciang a hauna teng amate lak hi— ama ii ngun le khamte, taciang hel namtuite ahizong paaknamtuite le a ngal vanh teng lak hi. Ama ii vanh kholna sung ahizong ama ii kumpi ngam sungah ahizong amate a lak ngawl vanh khat beak zongh a om bua hi. 14Taciang kamsangpa Isaiah sia Hezekiah Kumpipa kungah pai in, “Mihing hite koisung pan hong pai a, amate in nang tungah bang hong ci ziam?” ci in dongh hi.

Hezekiah in zo a, “Amate a khuala ngam Babylon panin hong pai hi,” ci hi.

15“Kumpi inn sungah amate in bang teng mu ziam?” ci in dongh hi.

“Amate in na theampo mu siat hi. Vanh senna inndoi sungah ka lak ngawl bangma om ngawl hi,” ci hi.

16Isaiah in kumpipa tungah, “TOPA Vaanglianbelpa in ci hi, 17na kumpi inn sungah vanh om theampo, na pute ii tu ni dong a khol sa theampo Babylon ah ki ciapui tu hun khat hong theng tu hi. Bangma kikhe ngawl tu hi. * 18Nangma ii suan le paal tatak te pawlkhat kiciapui tu a, a cil uh kinget in Babylon kumpipa inn sungah naseam in kikoi tu hi,” ci in son hi. *

19Kumpipa Hezekiah in hi teng sia ngal kilemna le ngam muanna ama ii nuntak sungah om tu hi ci in saang a, hi bangin zo hi, “TOPA tung pan nong thu piak teng sia thupha hi,” ci hi.

Hezekiah ii Maanna Bo
(2Khang tangthu 32:32-33)
20Hezekiah Kumpipa ii a sep a vawt dang teng, a ngal hanna, tuikholna khat a vawtna le khuapi tui neak tu leihawng a tawlet nate theampo sia Judah Kumpipate Tangthu sungah kikhum siat hi. 21Hezekiah thi a, a tapa Manasseh in a kumpi za laih hi.