Laithiangtho (Kumpite Niina 21-22)

1. Manasseh kum bangza aphak in kumpi suak ziam? 
a. 12
b. 16
c. 25

2. Manasseh in ___ ii lim sia Biakinnpi sungah koi hi. 
a. Baal
b.pathiannu Asherah
c. Khui milim

3. Manasseh in atapa sia ___ hi. 
a. meihal biakpiakna in nei
b. it peuma 
c. ngalsim kuan sak

4. Manasseh maan lai Jerusalem lampite tungah ___chisan baang hi.
a. thiampite
b. nausente
c. maw nei ngawlte

5. Judah kumpi Amon sia koi sungah thalup thuak ziam? 
a. Kumpi inn sung
b. Ngal sung
c. Biakinn sung

6. Judah kumpi Amon athatte akuate in that kik ziam? 
a. Ngalkapte
b. Judah mite
c. Pathian in

7. Josiah kum bangza aphak in kumpi suak ziam? 
a. 8
b. 12
c. 16

8. JOsiah in Biakinn ___ hi. 
a. hal tum
b. mun thak sa kakawi
c. pua kik

9. Thukham Laibu sia koisungah kimu kik ziam? 
a. Biakinnpi sung pan
b. Luphung nuai
c. Thiampipa inn

10. Kumpi Josiah tungah Thukham Laibu akua in simh ziam? 
a. Hilkiah
b.Shapha
c. Norman

11. Kumpi Josiah in Thukham Laibu akisim zawk ___ hi. 
a. a Puan balkeak
b. minam lampuite sam
c. biakinn pai

12. Pathian in kamsang akua zangh in Josiah ii kisiikkikna vai son ziam? 
a. Jeremiah
b. Isaiah
c. Huldah

Kumpite Niina 21

Judah Kumpipa Manasseh

(2Khang tangthu 33:1-20)
1Manasseh sia Judahte ii kumpipa a sua hunin ama ii pian kum, kum sawm le kum nii pha hi, taciang ama in Jerusalem panin kum sawmnga le kum nga sung uk hi. A nu sia Hephzibah hi. 2TOPA ii minamte mai hong nawt ciang a betkeak sak minamte ii a thasiat huai ngamtatna te zui in Manasseh in TOPA tungah maw hi. * 3A pa Hezekiah ii a suksiatcip sa Pathian he ngawlte ii biakpiakna munte ama in sa kik hi; Israelte ii Kumpipa Ahab ii vawt bang keak ma in ama in Baal biak natu biaktaute sa in, Asherah pathiannu ii milim vawt hi. 4Ama in Pathian he ngawlte ii biaktau te sia TOPA ii ama a kibiakpiak natu mun hi a ci Biakinnpi sungah sa hi. * 5Biakinnpi ii leitual te nii sungah aksite biakpiak natu biaktau te vawt hi. 6A tapa sia meihal biakpiakna in pia hi. Ama in aisaan theite, mitbum thiamte, mailam thuson theite le thaa thudongh theite, thu veu dongh hi. Ama in TOPA tungah nasia takin maw a, a thin uukna piang sak hi. 7Ama in pathiannu Asherah ii lim sia Biakinnpi sungah koi hi, tua mun sia TOPA in David le a tapa Solomon munah: “Hi mun Jerusalem ah hi Biakinnpi sia kei hong kibiak natu in minam sawm le niite ii ngam sung bup pan ka teal ahi hi. 8Taciang Israel mite in ka thupiakna te theampo ni in, ka thukham buppi Moses tungtawn in ka piakte keamcing in ahile amate ii pute tungah ka piak leitangh panin a kinawkeak tu ka oai batu hi,” a ci na mun ahi hi. * 9Ahihang Judah mite in TOPA thu ni ngawl a, Manasseh in TOPA ii a mite hong mainawt hun lai a, a betkeak mite sangin mawna nasia zaw a vawt natu in lampui hi.

10A naseam kamsangte tungtawn in TOPA in, 11“Kumpipa Manasseh in hi a thasiat huai mama nate Canaan mite sangin a nasia zaw lai in vawt hi; taciang ama ii milimte taw Judah mite mawna sungah lampui hi. 12Tua ahikom kei, TOPA, Israelte Pathian in Jerusalem le Judah tungah tuasiatna ka piang sak tu a, a za po in khing liang tu hi. 13Samaria daan ka piak bang le Israel Kumpipa Ahab le a suan a paalte ka vawt bangin Jerusalem daan ka pia tu hi. Jerusalem sia a mite bo dongin ka nawt thiang tu a, pakan nawt thiangin a khup lam a kikoi bangin ka thiang sak tu hi. 14A mite sung pan a nungta lai te ka nusia tu a, taciang amate sia a ngalte khut sungah ka aap tu hi, tuate in amate zo tu a, a leitangh phuul tu hi. 15Hi bangin ka vawt tu sia banghangziam cile ka mite in kei tungah hong khial a Egypt ngam pan a pute ii a pusua pan kipan tu ni dong ma ka thin uuk sak tawntung hi,” ci hi.

16Manasseh in mawna nei ngawl mihing tam mama thatlum a, Jerusalem lampite chisan luang hi; hi teng tung sia ah ama in a mite milim biakna ah lampui a, TOPA tungah maw sak hi.

17Manasseh ii sep le vawt a dangte theampo mawna a vawtte theampo kihel in, Judah Kumpipate Tangthu sungah kikhum hi. 18Manasseh thi a, kumpi inn huangsung Uzza huan ah kiphum hi, taciang tapa Amon in a kumpi za laih hi.

Judah Kumpipa Amon
(2Khang tangthu 33;21-25)
19Amon sia Judahte kumpipa a sua hunin kum kul le kum nii pha a, Jerusalem panin kum nii sung uk hi. A nu sia Meshullemeth hi a, Jotbah khua pan Haruz ii tanu ahi hi. 20A pa Manasseh bangma in ama in TOPA tungah maw hi; 21ama in a pa ii ngamtatna teng zui in a pa ii biak milimte bia hi. 22Ama in a pute Pathian TOPA sia nial a, TOPA ii thupiak ni ngawl hi.

23Amon ii uliante in ama suam sawm uh a, kumpi in sungah ama thatlum uh hi. 24Judah mite in Amon that teng thatlum uh a, taciang a tapa Josiah kumpi in koi uh hi.

25Amon ii a sep a vawt dangte theampo Judah Kumpipate Tangthu sungah kikhum hi. 26Amon sia Uzza huansung thaan ah kiphum a, a tapa Josiah in a kumpi za laih hi.

Kumpite Niina 22

Judah Kumpipa Josiah

(2Khang tangthu 34:1-2)
1Josiah sia kumpipa a sua hunin kum liat pha hi, taciang ama in Jerusalem pan kum sawmthum le kum khat sung uk hi. A nu sia Bozkath khua pan Adaiah ii tanu Jedidah hi. * 2Josiah in TOPA ii dik sak te vawt hi; ama in a pu David ii lam lak bangin ngamta a, Pathian ii thukhamte belcing takin zui hi.

Thukham Laibu Kimu
(2Khang tangthu 34:8-28)
3Kumpipa Josiah in a maan zawk kum sawm le kum liat laitakin, Meshullam ii tupa, Azaliah ii tapa zum thu zeakpipa Shaphan sia Biakinnpi ah sam sak a, 4“Pai tan a, thiampi Hilkiah munah, Biakinnpi tumna a tavuan nei thiampite ii mite tung pan a khon sumte bangza tak pha ziam sazian hong lak tahen. 5A sum sia Biakinnpi pua te ii ukte tungah pia tahen. Amate in, 6lettamate, innsate, uksuang ciangte thaman pia tahen a, thing le suang biakinn pua natu a kul teng leina in nei tahen. 7Nasepnate a ukte sia thumaan mama ahikom a sum zakna uh sazian vawt a sawl kul ngawl hi,” ci hi. *

8Shaphan in kumpipa ii thupiakna teng Hilkiah tungah a tut zawkciang Hilkiah in, Biakinnpi sungah Thukham Laibu kimu hi ci in son hi. Hilkiah in laibu a piak le Shaphan in sim hi. 9Tua zawkciang ama kumpipa kungah pai kikin thu ko hi: “Na naseamte in Biakinnpi sunga sum teng la in, innpuate a ukte tungah aap siat zo khu hi,” ci uh hi. 10Tua zawkciang ama in, “Hi sungah Hilkiah ii hong piak laibu khat nei khi hi,” ci hi. Taciang ama in kumpipa zaak tu in a nging in sim hi.

11Kumpipa in laibu a kisim sia thu a zaak ciang, thin nop ngawlna taw a puansilh lai eau keak a, 12taciang Hilkiah thiampipa tung, Shaphan tapa Ahikam tung, Micaiah tapa Achbor tung, zum thuzeakpipa Shaphan tung le kumpipa langpan pa Asaiah te tungah: 13“Pai tavun a, hi laibu huvau TOPA tungah kei taang le Judah mite taangin dongh tavun. TOPA sia ei tungah hong thin uuk hi, banghangziam cile ih pute in hi laibu ii ci bangin ngamta ngawl hi,” ci in thupia hi.

14Jerusalem khen thak khat sungah a teang Huldah a kici numei kamsang khat munah thu dongh tu in, Hilkiah, Ahikam, Achbor, Shaphan le Asaiah te pai uh hi. (A pasal Shallum, Tikvah ii tapa, Harhas ii tupa, hi a, ama in Biakinnpi sungah a zak puantualte a keam pa ahi hi.) Amate in thupiang teng ama munah son uh hi, 15taciang ama in amate sia kumpipa kungah cia kikin sawl hi, tua kawmin 16TOPA ii thupiak hi teng kumpipa puakin sawl hi: “Keima in Jerusalem le a sunga teang mihingte theampo kumpipa ii sim laibu sungah a ki at bangin daan ka pia tu hi. 17Amate in kei hong nial a, taciang pathian dangte tungah sangaw biakpiakna pia uh hi, tua ahikom amate ii sep le vawt tung panin ka thin uukna hong piang sak hi. Ka thin uukna sia Jerusalem tungah tu hi, taciang tua ka thin uukna sia veng ngawl tu hi. 18Kumpipa ama ahile, hi sia in kei, TOPA Israel ii Pathian in ci khi hi: Nangma in laibu sung a ki at teng ngai ni hi, 19taciang Jerusalem a mite daan ka piak tu te na zaak ciang kiniamkhiakna le kisiina taw ka mai ah na puansilh eaukeak in, kap ni hi. Mit mu bek zongin a lau huai mama ka suak sak tu a, mihingte in haamsiatna kammal in a zangh liang tu hi. Ahihang na thungetna hong za zo khi hi, 20taciang Jerusalem khua daan ka piak tu sia na thi maa in tung sak ngawl tu khi hi, thinnuam in kong thi sak tu hi,” ci hi.

A sawltak pasalte in hi thu teng kumpipa Josiah tungah puak kik uh hi.