Laithiangtho (Kumpite Niina 23-24)

1. Kumpi Josiah in thuciamna laibu a buppi in kuate simh ziam?  

a. Mipite

b. Kumhpi naseamte

c. A innkuanpuite

2. Josiah kumhpi pa akuate ii tenna inn sukthap sak ziam? 

a. Duhop sumleangte

b. Pumpi kizuakte

c. Doai thiampite 

3. Topheth kici biakna sia Molech pathian tungah___  biakna hi.

a. tapa tanu-te hallup

b. sangaw

c. antang le ngim namtui

4. Kumpi dangte ii vawt ngawl Josiah ii vawt poai sia?

a. Paisn poai hi.

b. Anlaak poai hi.

c. Milimte sukthap poai hi.

5. Josiah ii ___anit bangh kumhpi om ngei ngawl hi. 

a. Moses ii thukham

b. Thiampipa thu

c. pathian thu

6. Kumhpi Josiah in __te ahu tu akuan Egypt te sim thong hial hi.

a. Amon

b. Assyria

c. Babylon

7. Nebuchadnezzar in Judah sia kum thum sung  ___ sak hi.

a. a ma nuai lut kul

b. vut le vai ngam suak

c. kialpi tung

8. Babylon te, Syriate, Moabte, Ammonte in Judah lal natu ___ hi.

a. ngalnguuk sim uh

b. kikumh uh

c. Assyriate sam uh

9. TOPA ii mai sak zawk ngawl Manasseh ii mawna sia bang ziam? 

a. Mawnei ngawlte thalupna

b. Milim biakna vawt

c. A tapa athalupna

10. Akua sia Babylon ah sila in pai ziam? 

a. Jehoaiakim

b. Jehoiachin

c. Josiah

11. Nebuchadnezzar in kuate Babylon ah ciapui nuam ngawl ziam? 

a. Mizawngte

b. Pumpi kizuakte

c. Phaak natna veite

12. Nebuchandnezzar in ___ sia Judah kumhpi tu in koi hi. 

a. Zedekiah

b. Jehoiachin

c. Josiah

Kumpite Niina 23

Josiah in Pathian nei ngawlte Biakna Vawk

(2Khang tangthu 34:3-7, 29-33)

¹Kumpipa Josiah in Judah ngam le Jerusalem khua ii lampuite khawmtua hi, ²taciang amate Biakinn ah pai uh a, thiampite le kamsangte in ton pui in, midangte a hau a zawng kibang in pai uh hi. Amate ii mai ah kumpipa in Biakinnpi sungah a kimu thak thuciamna laibu a buppi in sim hi. ³Ama in kumpi khuamngual honte ii kungah dingin ama ii thu ni tu, a thupiakte le a thukham te sia thin theampo ngaisutna theampo taw keamcing in thuciamna taw a kithua laibu sungah ngetna theampo seam tu vawt tu in TOPA tungah thuciamna khat vawt uh hi. Taciang mihingte theampo in thuciamna keamcing tu in TOPA taw kiciam uh hi.

⁴Tua zawkciang Josiah in Thiampi Saang Hilkiah, a khut dawn thiampite, Biakinnpi tumna cingin a om tavuan neite munah, Biakinnpi sungah Baal biakna, pathiannu Asherah biakna le aksite biakna vanh theampo pusua siat tu in thu pia hi. Kumpipa in hi vanhte sia khuapi puasang Kidron luamkuam hui ah haltum in, a vaam teng sia Bethel ah paipui hi. * ⁵Ama in sangaw biakpiakna le Pathian he ngawlte biakna taute tungah, Judah ngam le Jerusalem ah— Judah kumpi masa te ii kip sak thiampite, Baal tung a sangaw biakpiakna a pia thiampi theampo, ni, tha, aksi le solh te biakna sung a seam theampo heamkhia hi. ⁶Ama in Biakinnpi sung pan Asherah pathiannu ii lim sia la keakin khuapi pua sang Kidron luamkuam ah a haltum zawkciang a vaamte leivui sungah sucip in mipi kiphumna munah poai hi. ⁷Ama in Biakinnpi a tenna inn, pumpi zuak te omna te sutham hi. (Numeite in tua munah puantualte Asherah biakpiak natu a kizanghte tak uh hi.) ⁸Ama in Judah khuapite a om thiampite Jerusalem ah paipui hi, taciang ngambup sungah sangaw biakpiakna vawtna biaktaute theampo phiat hi. Khuapi kongpi sung tum ciang vei sangah khuapi ukpipa Joshua ii vawt kealdoai tungah a ki aap, biaktau sia baltham hi. ⁹Tua thiampite sia Biakinnpi sungah a sep tu ki oai ngawl hi, ahihang amate ii thiampite a kipia tol saw ngawl anluumte ne sak uh hi.

¹⁰Kumpipa Josiah in Topheth a kici doaibiakna mun Hinnom Kuam a om sia, kuama in a tapa, a tanute Molech pathian tungah meihal biakpiakna in a nei thei ngawl natu in laltham sak hi. * *¹¹Ama in Judah kumpite ii ni biakpiakna in a zak siphute heam a, hi biakpiakna sung a kizangh leangte haltum hi. (Hite sia biakinn leitual ii kongkha hui ah Nathan Melech thiampi saang pa ii tenna inn hui ah kikoi hi.) ¹²Kumpipa Ahaz ii tenna kumpi innkhum tungah Judah kumpipate ii sak biaktau le kumpipa Manasseh ii Biakinn leitual te nii sungah biaktau sia vaattham in; biaktaute saatneen in a bek a bek in Kidron Kuam ah vawk hi. * ¹³Josiah in Kumpipa Solomon ii sak Jerusalem ii nisuana sang Olive Mualvum thang sangah a thasiat huai milimte le biaktaute lal sak hi— tua milimte sia Sidon te pathiannu Astarte, Moabte ii pathian Chemosh, Ammonte pathiante Molech te ahi uh hi. * ¹⁴Kumpipa Josiah in suangkhuamte balneen in, Asherah pathiannu ii milim zongh laitham in, taciang tuate ii dinna munte sia mithi ngu taw siin hi.

¹⁵Josiah in Israelte mawna sungah a lampui Nabat ii tapa Kumpipa Jeroboam ii sak Bethel a biakpiakna mun sia zongh laitham hi. Josiah in biaktau sutham a, a suangte a bekin sutham in leivui suak tu in sucip hi; ama in Asherah ii lim zongh haltum hi. * ¹⁶Tua zawkciang Josiah in a kiimkot a et le mualtungah thaan pawlkhat mu hi; ama in mithi ngute la in biaktau tungah hal sak hi. Kumpipa Jeroboam sia biaktau hui ah dingin a om lai in kamsang khat in hi bang teng piang tu hi ci in nidang pek lai in a sonkhol sa bangin ama in biaktaute nin sak hi. Kumpipa Josiah in a kiimkot a et le tua a sonkhol kamsangpa ii thaan mu hi. * ¹⁷Ama in “Zia sia akua thaan ziam?” ci in dongh hi.

Bethel mite in, “Tasia Judah panin hong pai kamsang khat ii thaan hi a, biaktau tungah na vawt tu teng a son khol sia hi,” ci uh hi. *

¹⁸Josiah in, “A om bangin om sak vun,” ci in thupia hi. “Ama ii ngute sia kiheam khia ngawl tu hi,” ci hi.

Tua ahikom a ngute sia kikhiin ngawl a, Samaria pan hong pai kamsangte ii ngu zongh kiheamkhia ngawl hi.

¹⁹Israel khuapite sim in, Kumpipa Josiah in Israelte kumpite ii vawt milim biate biakna munte sutham siat hi, tua kumpite in TOPA thin uukna piang sak uh hi. Tua biaktaute sia Bethel a te a vawt bangin vawt hi. ²⁰Ama in Pathian he ngawl thiampi theampo sia amate ii sepna biaktau tungah thatlum a, taciang ama in biaktau sim tungah mithi ngu hal hi. Tua zawkciang ama Jerusalem ah heak kik hi.

Josiah in Paisan Poai Vawt

(2Khang tangthu 35:1-19)

²¹Kumpipa Josiah in a mipite munah thuciam laibu sungah a ki at bangin TOPA upatna Paisan Poai vawtin sawl hi. ²²Hi sia bang Paisan Poai sia Israel kumpipate Judah kumpipate in Thukhen maangte ii ngam a uk zawk peuma in kuama in vawt ngei ngawl hi. ²³Tu in a khak bel ciang Josiah ii maan zawk a kum sawm le liat hun ciang Jerusalem khua sungah Paisan Poai kivawt hi.

Josiah ii A dang Kikhealna A vawtte

²⁴Thiampi Saang Hilkiah ii Biakinnpi sung pan a mu Thukham laibu sungah a ki at te bang ngamtat thei natu in Kumpipa Josiah in Jerusalem pan le Judah ngam lei dang panin, thaa taw kipaupui thei te theampo, mailam thuson khol theite, baangkua pathian note, milimte, a dang milim biate ii biakpiakna in a zak nate a vekpi in heam siat hi. ²⁵Ama ii TOPA atu thin theampo ngaisutna theampo le thatang theampo taw seam a, Moses ii thukham a nit bang in ama mai ah kuama kumpi khat zongh om ngei ngawl hi; ama zawkciang zong tabang kumpi khat zongh om ngawl hi.

²⁶Ahihang TOPA ii a nasia mama a thin uukna sia Kumpipa Manaseh ii ngamtatna hangin Judah te tungah hong tung a, tu dong ma in thai ngawl hi. ²⁷TOPA in, “Israel tungah ka vawt sa bangma Judah tungah vawt tu khi hi: ka muna pan Judah mite sia hawlkhia tu khi hi, taciang ka teal Jerusalem khuapi le keima hong kibiakpiakna mun tu hi ka ci Biakinnpi sia dong, ka nilkhia tu hi,” ci hi.

Josiah ii Maan A tawpna

(2Khang tangthu 35:20-36:1)

²⁸Kumpipa Josiah ii a sep a vawt dangte theampo sia Judahte Kumpipate Tangthu sungah kikhum hi. ²⁹Josiah sia kumpi ahi laitak ma in, Egypt kumpipa Neco in Assyriate kumpipa hu tu in ngalkap hon taw Euphrates Ngun dong hong kuanto hi. Kumpipa Josiah in Egypt ngalkap hon te khak tu in hanciam a, ama Megiddo ngalphual ah kithat hi. ³⁰Ama ii uliante in ama luang sia leang tungah suan in Jerusalem ah ciapui uh a, kumpi thaan ah ama kiphum hi.

Judah mite in Josiah ii tapa Joahaz tealin kumpi suak sak hi.

Judah Kumpipa Joahaz

(2Khang tangthu 36:2-4)

³¹Joahaz sia kumpi a sua hunin kum kul le kum thum pha hi, taciang ama in Jerusalem pan tha thum sung uk hi. A nu sia Hamutal hi a, Libnah pan Jeremiah ii tanu ahi hi. ³²A pute ii zia zui in ama in TOPA tungah maw hi. ³³Ama ii maan hun sia Egypt te Kumpipa Neco in Hamath ngam Riblah ah thong taakin a koi ciang, bo a, Judah in ngun pound 7,500 le kham pound 75 shia in pia sak hi. ³⁴Kumpipa Neco in Joahaz ii tapa Eliakim sia Joahaz laih tu kumpipa in koi a, a min zongh kheal sakin, Jehoiakim ci hi. Joahaz sia Kumpipa Neco in Egypt ah ciapui a, tua sungah thi hi. *

Judah Kumpipa Jehoiakim

(2Khang tangthu 36:5-8)

³⁵Kumpipa Jehoiakim in a mite tung pan amate hauna taw kizui in shia khon a, Egypt Kumpipa ii nget za a cingin a piak zawk natu in tabangin vawt hi.

³⁶Jehoiakim sia Judah kumpipa a sua hunin ama kum sia kul le nga pha hi, taciang ama in Jerusalem panin kum sawm le kum khat sung uk hi. A nu sia Zebidah hi a, Rumah khuapino panin Pedaiah ii tanu hi. * ³⁷A pute ii zia bangin ama in TOPA tungah maw hi.

Kumpite Niina 24

¹Jehoiakim sia kumpipa ahi laitakin Babylon Kumpipa Nebuchadnezzar in Judah sim hi, taciang kum thum sung Jehoiakim sia ama ii khut nuai ah hong lut kul hi; tua zawkciang tualngal hong tho hi. * ²TOPA in Babylon te, Syriate, Moabte, Ammonte tungah ngalnguk sim tu in Judah ah pai sak a, Jehoiakim langpanin Judah lal sak tu in kipan uh hi, TOPA in a naseam a kamsangte tungtawn in ka vawt tu hi a ci bangin vawt hi. ³Hisia TOPA ii thupiakna taw a piang hi a, Kumpipa Manasseh ii mawnate hu in Judah mite muna pan a betkeak natu in thu piang ahi hi, ⁴taciang, a tuan in maw nei ngawlte a thalup hu ahi hi. TOPA in Manasseh ii tabang a mawna te mai sak zo ngawl hi.

⁵Jehoiakim ii sep le vawt theampo sia Judah Kumpipate Tangthu sungah kikhum hi. ⁶Jehoiakim thi a, a tapa Jehoiachin in a kumpi za laih hi.

⁷Egypt kumpipa le a ngalkap honte in Egypt pua sia ah kuan kik nawn ngawl uh hi, banghangziam cile Babylonia te in tu in Egyptte ii ngamkhen theampo, Euphrates Ngun pan Egypt saksang ngamngi dong uk hi.

Judah Kumpipa Jehoiachin

(2Khang tangthu 36: 9-10)

⁸Judah te ii kumpipa a sua hunin Jehoiachin sia ama pian kum, kum sawm le kum liat pha hi, taciang ma in Jerusalem panin tha thum sung uk hi. A nu sia Nehusta hi a, Jerusalem khua pan Elnathan ii tanu hi. ⁹A pa ii ngamtat teng zui in Jehoiachin in TOPA tungah maw hi.

¹⁰Ama ii maan hun sungah Babylonia ngalkap honte sia Nebuchadnezzar uliante in uk a, Jerusalem sim tu in kuan a, uumci uh hi. ¹¹Ama ii tabang a uumci lai in Nebuchadnezzar ama mama Jerusalem ah hong pai hi, ¹²taciang Kumpipa Jehoiachin sia a nu, a tapate, a uliante, le kumpi inn uliante taw Babylonia te tungah tum uh hi. Nebuchadnezzar ii maan a kum liatna hunin ama in Jehoiachin sia thong taak tu in paipui a, * ¹³Biakinnpi sung le kumpi inn sungah sum le paai theampo pua siat hi. TOPA ii sonkhol bangma in Nebuchadnezzar in Biakinnpi sungah zak tu Solomon kumpipa ii vawt kham ankuang ankeaute pua siat hi. ¹⁴Nebuchadnezzar in Jerusalem mite, kumpipa tate le lampuite theampo thongtaak tu in ciapui hi, a vekpi kingawm tulsawm pha hi. Ama in khutthiamna nei theampo, thikseakte dong ciapui hi, Judah ah mizawng bel teng bek nusia hi.

¹⁵Nebuchadnezzar in Jehoiachin sia thongtaak tu in ciapui hi, Jehoiachin ii nu, a zite, a uliante le Judah a lampuite theampo taw kopin ciapui hi. * ¹⁶Nebuchadnezzar in mihing thupi theampo Babylon ah puak hi, a vekpi in tulsali pha uh hi, taciang thiamneal naseam thei tulkhat, thikseakte kihel, ngalkap seam thei tu pumpi cing vive ahi uh hi.

¹⁷Nebuchadnezzar in Jehoiachin ii pano, Mattaniah sia Judahte kumpipa tu in koi a, a min zongh Zedekiah ci in kheal hi. *

Judah Kumpipa Zedekiah

(2Khang tangthu 36:11-12; Jeremiah 52: 1-3a)

¹⁸Judahte ii kumpipa a sua hunin Zedekiah sia a pian kum, kum kul le kum khat ahi hi, taciang ama in Jerusalem panin kum sawm le kum khat sung uk hi. A nu sia Hamutal hi a, Libna khua mi Jeremiah ii tanu ahi hi. * ¹⁹Kumpipa Zedekiah in TOPA tungah Kumpipa Jehoiakim maw bang tatakin maw hi. ²⁰TOPA sia Jerusalem le Judah te tungah thin uuk mama ahikom ama muna pan beng keak hi. *