Laithiangtho (Nahum 1-2)

1. TOPA Pathian in ___te kuama dual ngawl hi.

a. ama a demte

b. akiphasak

c. ama anunau

2. TOPA thin uuk memeang ngawl a, ___ ngei ngawl hi.

a. daan pia ngawlin thasua

b. he

c. khuangai

3. Meeite sia a ___na pan leivui khute ahi hi!

a. sang

b. a peang taw a siina

c. nguazuh 

4. Ama kung a zuante ama in ___hi.

a. keamthiam 

b. hau sak

c. zawnna kisin sak

5. TOPA ___ atu in thaankuul khat ka vawt khol tu ci hi.

a. Assyriate

b. Samariate

c. Babylonte

6. Pathian tung ah ___te pia vun. 

a. a sumpite

b. piak kik tu na kamciamte

c. ngual ii hong piak

7. ___te mainawt in a pai ciang lutu uh hi.

a. Ngalkap maangte

b. Siphute

c. Kumpipa tapate

8. Ninevehte te “___vun!” kici ahihang heak kik ngawl uh hi.

a. “Kuan vun!”

b. “Tawlnga vun!”

c. “Kinging vun!”

9. ___sia kilalcip sak, ki nusia in, ngamkhing hi.

a. Jerusalem

b. Judah

c. Nineveh 

10. Tawpi ii kuahawng sia bang taw kidimh ziam? 

a. A kibalneen Mihingsa

b. Chisan

c. Mihingnguu

11. “Keima in na___ ka hi hi!” TOPA Vaanglianbelpa in ci hi. 

a. na ngalpa

b. Pa

c. Ngualzopa

12. TOPA na akuate ii ngetna hong kong za nawn bua tu ci ziam? 

a. A tate

b. Palaite

c. A kiphasakte

Nahum 1

1Hi thu in Nineveh khua taw kisai thu hi a, Elkosh khua mi Nahum ii mu kholna khat tepteena ahi hi. *

Nineveh tungah TOPA ii Thin uukna
2TOPA Pathian in ama a demte kuama dual ngawl hi;
ama in ama a langpante daan pia hi.
A thin uukna taw amate thuh kik hi.
3TOPA thin uuk memeang ngawl a,
ahizong ama vaanglian in
a khialte daan pia ngawlin thasua ngei ngawl hi.
TOPA paina ah suangval va a;
Meeite sia a peang taw a siina pan leivui khute ahi hi!
4Ama in tuipi thupia a, tuipi kang hi!
Ama in ngunte ko ngiungeu sak hi.
Bashan lote kocip in,
Carmel Mual sia a puang suak in,
taciang Lebanon paakte vul hi.
5TOPA mai ah mual pi te liing a;
ama mai ah mualnote tuitham hi.
TOPA a kilangh ciang leitung kithing a;
leitung le a mite theampo liing hi.
6Ama thin uuk ciang akua in thuak zo tu ziam?
A lauhuai mama a thin uukna akua in thuak zo tu ziam?
A thin uukna meikuang buak suk a;
suangtumpuite ama maiah leivui suak tu in tamtham hi.
7TOPA pha hi;
ngimna hun sungah a mite sungsia hi.
Ama kung a zuante ama in keamthiam hi.
8Ngalhawk lian khat bangin a ngalte sucip siat a;
ama a langpante thina sungah puak hi.
9TOPA langpan in
bang vawt sawm nu ziam?
Ama in no hong susia tu hi.
Kuama in khatvei kaan ama nalh ngawl hi.
10Lingngui kivialte le taangphaw
ko bangin nang hong kihaltum tu hi.
11Nineveh awng, ngitlona taw kidim TOPA vawtsiat a sawm mihing khat nang kung pan hong pai hi. 12Hisia in a mi Israelte tungah TOPA ii son sia ahi hi. “Assyriate hat in mihing tam kale amate kisusiacip in, bo tu hi. Ka mite awng, note in kong thuak sak a, ahizong tabangin kong thuak sak kik batu hi. 13Tu in note tungah Assyriate vaangletna ka bo sak tu a, hong kiheenna thikkhaute ka sutan tu hi,” ci hi.

14Hisia in Assyriate taw kisai TOPA thutanna ahi hi: “Amate min zomto tu in amate in suan le paal nei ngawl tu hi. Amate pathiante ii biakinnte sungah a om milimte ka sutham tu hi. Assyriate atu in thaankuul khat ka vawt khol tu hi- amate a nungta tu in kilawm ngawl uh hi,” ci hi. *

15En vun, thupha puak kamtai khat mualtung tawnin hong pai hi! Ama in zawna taangko tu in hong pai ahi hi! Judah mite awng, na poaipi khaam vun a, Pathian tung ah ciliap huai takin, piak kik tu na kamciam sate pia vun. Mingilote in na ngam uh hong sim ngei nawn ngawl tu hi. Amate sia kilal sak diipdeap zo hi!

Nahum 2

Nineveh khua Bona

1Nineveh awng, nang hong kisim hi! Nang hong sutham zaan tu vaangletna hong pai zo hi.

Kulhte pan pang vun! Lampi cing vun!
Ngalsim tu in kithoai vun!
2(Israel mite a ngalte ii sutol maa hun lai bangin
a minthanna pia kik tu in TOPA kithoai hi.)
3Ngalte sang ngalkapte in lumsante toai a,
a kibang puansante silh hi.
Amate ngalsim tu in kithoai hi!
a ngalkap siphuleangte
meikuang bangin te vazak hi!
A siphute pai nuamin a peang lalaam zo hi!
4Lampite kantan in siphuleang tai kheukho a,
khuapi leitual sungah ki nuntaw lialua hi.
Amate sia mei lomsawmte bangin taang vazia a,
khualeng bangin peak kakoai hi.
5Ngalkap maangte kisam a;
mainawt in a pai ciang amate lutu uh hi.
A simte in khuapi uumna
taap sang del in a lumte taw kidal uh hi.
6Ngunhui a kongpite kihong keak a;
kumpi inn sia launa taw kidim hi.
7Kumpinu kiman a;
a naseamte vakhu bangin kuul uh a;
khuangai in a awm beang uh hi.
8A cimhtham tui cimna khat pan
tuiluang bangin Nineveh pan mihingte pusuak uh hi!
“Tawlnga vun! Tawlnga vun!” ci in aw nging hi-
ahizong kuama heak kik ngawl hi.
9Nguntangte phuul vun!
Khamtawnte phuul vun!
Khuapi sia sumngum taw kidim hi!
10Nineveh sia kilalcip sak, ki nusia in, ngamkhing hi.
Launa taw thin tui vadil a;
khupte liing vadil in, thabo vangeu hi;
maitang zongh daang vadel hi.
11Tawpite ii kua khat taw a kibang,
tawpi moite ii ki vaakna mun ahi,
tawpi talte le tawpipui vana,
a note ngammuang a a omna khuapi sia tu in koi sungah om ziam?
12Tawpi in a neak tu sa manin
a zi le a note atu balneen a,
ama in akua hawng sia sa balneen taw dimh hi.
13“Keima in na ngalpa ka hi hi!” TOPA Vaanglianbelpa in ci hi. “Na siphu leangte haltham tu khi hi. Na ngalkapte ngal sungah kithatlum tu a, midangte tung pan na laakte theampo la siat tu khi hi. Na palaite ii ngetnate kiza nawn ngawl tu hi,” ci hi.