DKBA Lampui U Thuzana (Or) Biakinn Susia Nuampa Taangthu


Tutuung Karen Ngam, Myaing-gyi-nguu Karen Tuiphum Biakinn huang sungah Budah pagoda khat thuzaaksak nei ngawl asa va-ngaat sak sia Myaing-gyi-ngu syadawpa U Thuzana hi aa, September 15,2015 DVB report bangh hi leh, Pagoda sak tu vai ka tawlnga bua tu ci hi.

Ama sia Karen budah hiamtoai pawl DKBA tungah thunei vaial aa, Kawlkumhpi in DKBA sia border guard force tu in akoinopna sia nial sak hi. DKBA ii leitungthu thaa thu thudokpi khat hi.

Ama sai Pwo Karen hi in, tulaitak kumh 67 pha aa, Karen ngam Hlaingbwe pan hi, kumh 20 aphaak lai khawng KNU sung tum aa, 1975 kumh in KNU sung biakna taw kisai EC member khat hi aa, 1980 Jun tha khawng in KNU sungah Tapidaw le Buddah biakna bia te kitelkhialna nasia tatak piang hi, tua hunlam KNU Chairman pa Saw Bo Mya in 1989 ciang U Thu Za Na sia Buddah pagoda khat sak tu sawl hi. Ahihang tua pagoda sak vai aa, Tapidaw leh Budah biakna bia te nasia tatak kitelkhial aa, cisan luanna, kithalupna dong theng uh hi. KNU pan pusuak in Salween ngun pangh, Myaing - gyi - nguu mual tungah budah biakna taw thunget kipan hi. 

1982 kumh in sa ne ngawl (vegetarian) community kipan aa, Myaing Gyi Ngu khuapi lui ci in khua saat aa, abiakinn nasia sak peuma hi. Tua munh sia DKBA te ii phualpi zongh hi. Tua khua ah thukun 5 zui tu sia :-
1) Thin uk thei ngawl
2) Kihau thei ngawl
3) Ngamvai(Polictic) son thei ngawl
4) Biakna taw kisai Thu kikumh thei ngawl
5) Nawnsan thu son thei ngawl tu hi.

U Thuzana nungzui pawl zongh KNU tapidawte ii simh thuak ahikom, 1994 December le 1995 kumh ciilsawl ciang DKBA ci pawl hong ding aa, ngalkap 6000 bangh hong pha uh hi. Tua hun ciang DKBA in Tapidawte ii omna te hong sim aa, Thailand ngam sung om Karen tapidaw te ngangawn that laleau uh aa, KNU Head Quater Manerplaw ah Pagoda khat sa uh hi.

U Thuzana sia mualtungah teen top khensat in phonggyi asep ciil sawng in, ni 49 antang thungetna taw a TB natna dam in kison hi.  A mungtup sia Karen ngam sia Budah bia kilemna ngam asua natu hi. Mitbum le khutlamen thei hi. Budah pagoda ama ii pua kik sia 70 cing zo aa, Karen ngam sungah Pagoda ngo 50 asak manh ciang Karen ngam sia kilemna om tu ci'n thupulaakna ngaa hi.

DKBA te sia Kawl kumhpi in panpui vet aa, lampi vawt, zato innsa in, Karen buddah biakna biate nasia tatak panpui laleau uh hi.
U Thuzana ii nungzui Karen followers te in U Thuzana sia “Phu Ga Cha” ci in sam uh hi akhiakna sia “topa theampo ii pu” cinopna hi.

0 comments:

Post a Comment