Laithiangtho Dokna (Ezekiel 17-18)

1. Muvanlai khat Lebanon pan bang thingkung thiaktan in tua ziam?
a. Olive
b. Cedar
c. Sapit

2. Mul sau muvanlai sangah muvanlai amasa sia in abang khiin ziam?
a. Theikung
b. Sapit
c. Milim

3. Ezekiel in Sapit ngui sia koi sung panh hui ii nawk aa avul tu lau ziam?
a. Sak sang vui
b. Nitumna sang vui
c. Nisuana sang vui

4. Judah kumhpipa in Babylon kumhpipa tungah kiciam ahihang ___ hi.
a. a ngina seam ngawl
b. athin tak hi ngawl
c. ledo vave

5. TOPA in bang thingkung sia mualsangbelna ah suan sawm ziam?
a. Olive
b. Ceder
c. Sapit

6. TOPA in “___ te ka vawt tatak tu hi,” ci hi.
a. vawt tu ka ci
b. haksatna
c. a kisin natu thu

7. Israel paunak "Nu le pate in sapit thuk ne a, ___uh hi"
a. kham tawntung
b. a tate a ha khim
c. a limna tel ngawl

8. Tapa khat in a pa ii a mawna hu in ___ tu hi.
a. thuak
b. thuak ngawl
c. heakna nei

9. TOPA in ___ kisiik kikin nungta le oai zaw ziam?
a. kumhpipa sia
b. mawneite
c. atate theampo

10. Akuate na TOPA ngamtatna maan ngawl ci ziam?
a. Baal thiampite
b. Ngamdangmite
c. A mite

11. Ama thi sia a ___ hang ahi hi.
a. thumaan
b. ngamtat siatna
c. ki phatsak

12. ___bangin, thu kong khen tu hi.
a. Na vawt uh
b. Ka thukun om
c. Nasep tu akilawmte



Ezekiel 17
Muvanlai le Sapit ngui Sonteena
1TOPA in kei hong paupui a, 2“A thi thei mihing awng, Israel mite tungah thu sontee na khat son in a, 3Kei, Vaanglianpipa TOPA in hi bangin ci hi; Muvanlai a lian mama khat om a, a thate zongh lian in hoi mama a, a thakhui te zan in a zai in phal hi. Ama in Lebanon mualpite ah leangin cedar thingkung khat ii dawn thiaktan a, 4sumvawtte ngamah paipui in, sumbuk khuapi khat ii sungah koi hi. 5Tua zawkciang ama in, thingno khat Israel ngam panin la a, a khang sak tu tui om tawntungna lei phana mun khat ah suan hi. 6A kung hong meang a, a niam, a zai a zam sapit ngui khat hong suak hi. A baakte muvanlai sangah hong khangto a, zung thukte tha hi. Sapit ngui sia a baak le a teete taw kidim hi.

7Taciang a lian mama, a thalian, a mul a saa mama muvanlai dang khat om hi. Tu in sapit ngui in, ama ii pona huansung sangin, tui tam zaw a nga zaw natu, lametna taw a zung le a teete tua muvanlai sang nga sak hi. 8Ahihang sapit ngui sia leipha na, tui kicingna munah kisuan zo a, a tee meang tu a, a nga nga in a limci mama sapit ngui a sua natu ahi hi.

9“Tua ahikom, Kei, Vaanglianpipa TOPA in, hi bangin ka dongh hi. Hi sapit ngui sia hingin a khang tu ziam? Muvanlai masa sia in a zung botin, sapit ngate zuk keakin, a baakte thiaktan in, vul sak ngawl tu ziam? Sapit ngui a bawkeak natu thahatna lianpi ahizong, minam lian ahizong kul ngawl tu hi. 10Hi hi, hi sapit ngui sia kisuan hi, ahizong hingin a khang tu ziam? Nisuana sang vui in a nawk ciang vul ngawl tu ziam? A po munah vul ngawl tu ziam?

Thu sonteena ii Khiakna
11TOPA in kei tungah, 12“Hi tualngalte munah hi sonteena ii a khiakna a he uh ziam, ci sia dongh in. Amate tungah son in a, Babylonia kumpipa Jerusalem ah hong pai a, taciangin kumpipa le uliante Babylonia ah ciapui uh hi. 13Ama in kumpipa innkuanpuite khat la in, kiciamna khat vawt a, ama ii tungah thumaan tu in, kiciam sak hi. Ama in mihing thupi pawlkhat luangkhaam in ciapui a, 14Amate in a kiciamna bang a zui natu le a leedo kik ngawl natu in, a deina ahi hi. 15Ahihang Judah kumpipa in leedo veve a, Egypt ngam ah siphu le ngalkap honpi khat sam tu in palai paisak hi. Ama in a tupna a tangtun tu ziam? Ama in tabang teng taw suakta tu ziam? Ama in kiciamna paltan thei ngawl tu a daan thuak ngawlin, om thei ngawl tu hi.

16“Keima a nungta Pathian ka hi sia maan ahi bangma hi kumpipa in a kiciamna le kumpi tokhum tungah a koi Babylonia kumpipa taw a kamciam le a thu kiciamna paltan ahikom Babylonia ah thi tu hi. 17Babylonia kumpipa in mihing tam mama a thalup natu in, kulhte leidumte vawt ahikom a thahat Egypt kumpipa ngalkapte ngangawn in ama hu zo ngawl tu hi. * 18Ama in a kiciamna le a kamciamte paltan hi. Hite theampo ama in vawt ahi ciangin ama a suakta batu hi,” ci hi. 19Vaanglianpipa TOPA in ci hi, “Kei a nungta Pathian ka hi takpi bangma in ka min taw kamciam a piak sa kiciamna paltan ahikom daan ka pia tu hi. 20Savaipa ngen ka khak tu a, ama ka man tu hi. Babylonia ah ka paipui tu a, kei tungah hong thumaan ngawl ahikom tua munah daan ka pia tu hi. 21Ngal sungah ama ngalkap phabelte kithatlum tu hi. Taciang a thi mong teng mun theampo ah ki thethaang tu hi. Taciang Kei, TOPA ka hi sia na he tu hi.”

Pathian ii Lametna Kamciam
22Vaanglianpipa TOPA in hi bangin ci hi,

“Cedar thingkung pui ii dawn khat ka zam tu a,
taciang a meang moino khat ka thong tu a,
mualsaang bel khat,
23Israeal mualsaang bel ii tungah ii tungah ka suan tu hi.
A baak tha tu a, cii a nei tu hi.
Taciangin a thanop huai mama cedar kung suak tu hi.
Vacim namcin tua ii tungah teang tu a, a lim beal tu uh hi.
24Ngamsung thingkung theampo in
Keima, TOPA ka hi sia hong tel tu uh hi.
Thingkung saangte ka tan tu a,
taciang a niam thingkung te a saangin ka khang sak tu hi.
Thingkung hingte ka vul sak a,
taciang thingkung kote, ka hing sak tu hi.
Keima, TOPA in son zo khi hi. Vawt tu ka ci te ka vawt tatak tu hi,” ci hi.

---------------------------------------------
Ezekiel 18
Misim ii sep tu Tavuan
1TOPA in kei hong paupui a, hi bangin hong ci hi. 2“Israel ngam sungah paunak a kilo kikik sia bang ziam?

‘Nu le pate in sapit thuk ne a,
a tate a ha khim uh hi,”
3“Keima a nungta Pathian ka hi tatak bangma in,” Vaanglianpipa TOPA in ci a, “Israel ngam ah hi paunak sia na lo kikik nawn batu uh hi. 4Mihing theampo ii nuntakna sia keima aa hi a, nute pate nuntakna le tate nuntakna dong sia keima aa hi. Mihing a maw sia a thi tu sia hi.

5“Sonteena in mihing pha mama, thumaan thutang khat om hi. 6Ama in Israelte milim bia ngawlin, a kikhaam biakna munah biakna a kipia ante ne ngawl hi. Ama in ngualdang khat ii zi sia zol sak ngawlin, a nin suak numei khat ompui ngawl hi. 7Ama in kuama theam ngawl a neisa sut ngawl hi. Sumpute ii a vanh aapte pia kik a ngilkialte an vaak in, puansilh selte puan pia hi. 8Ama in sum meet pukthaak ngawl hi. A sia vawt tu nial in, thu kituu na sungah a tang in thukhen hi. 9Tabang mihingte in ka thukham tang a, ka thupiakte ni hi. Ama sia thutang a, tua ahiciang nungta tu hi,” Vaanglianpipa TOPA in ci hi.

10“Taciang sonteena in, hi mipha pa in, tapa khat nei a tua tapa in ngualsuam in that a, 11a pa ii vawt ngei ngawl phat ngawlnate vawt hi. Ama in a kikhaam biakna munah, a kipia ante ne in, ngualdang zi zolin, luppui hi. 12Ama in a zawngte theam a, suamin, sumpute ii a aap vanhte tang hi. Ama doai biakna munah pai in, a kiihuai milimte bia hi, 13taciang summeet pukthaak hi. Ama a nungta tu ziam? Nungta vet ngawl tu hi. Ama in hi a kiihuai nate theampo vawt ahikom thi tu hi. Ama ii thina hangin ama kimawsiat tu hi.

14“Tu in mihing a niina pa in, tapa khat nei hi. Ama in a pa ii vawt theampo mu hi. Ahihang a pa lam lakna zui ngawl hi. 15Ama in Israelte biakpiakna munah milim bia ngawl, a kikhaam biakna munah a kipia ante ne ngawl hi. Ama in ngualdang khat ii zi zol sak ngawl a, 16kuama nengcip ngawlin, kuama suam ngawl hi. Sum pupa ii aap vanhte pia kik hi. A ngilkialte anvaak a, puansilh selte puan pia hi. 17Siatna vawt tu nial a, summeet pukthaak ngawl hi. Ka thukhamte tang a, ka thupiakte ni hi. A pa maw hu in, ama sia thi ngawl tu hi. Ama sia nungta tatak tu hi. 18A pa ahile ngual theam a, suam a, mihing theampo tungah siatna vawt hi. Tua ahikom ama mama ii vawt mawnate hu in thi hi. 19“Banghangin a tapa in a pa mawna hu in thuak ngawl ziam? ci tu nu hi. A zo kikna sia tapa in a maan le a phate seam hi. Ama in ka thukhamte keamcing in, belcing takin zui hi. Tua ahikom ama sia nungta tatak tu hi. 20A khial a maw pa sia thi tu hi. Tapa khat in a pa ii a mawna hu in thuak ngawl tu hi. Pa zongh in tapa ii mawna hu in thuak ngawl tu hi. Mipha sia a pha vawtna hu in thaman kipia tu a, misia pa in a sia avawt na hu in thuak tu hi.

21“Mihing ngilo khat in, mawna vawt nawn ngawlin, ka thukhamte tangin, ama in a pha le a maan a seam le, ama thi ngawl tu a, ama nungta tatak tu hi. 22A mawna theampo kimai sak tu a, ama nungta tu hi. Banghangziam cile ama in a maan in ngamta hi. 23Mihing pha ngawl khat a thi ciang dik sa tu nong um ziam?” Vaanglianpipa TOPA in dongh hi. “Dik sa ngawl khi hi; kisiik kikin nungta le oai zaw khi hi,” ci hi. 24Ahihang mihing thutang khat in, phatna a vawtte khealin, siatna theampo vawt tu hong kipan in, misiate ii a kiihuai ngamtatna te hong seam le a nungta tan lai tu ziam? Nungta ngawl tu hi! A pha a sepnate khat zongh kiteptee sak ngawl tu hi. A thumaan ngawlna le a mawna hu in thi tu hi. 25“Ahihang Vaanglianpipa TOPA ngamtatna maan ngawl hi na ci uh hi. Israelte awng kei hong ngai tavun. Na ka vawt zia sia maan ngawl hi na ci uh ziam? A maan ngawl sia noma ngaisut zia hi zaw hi. 26Mihing thutang khat in a pha nasepte tawpin, a siate sep tu a kipan le tasia ciang ama sia thi hi. Ama thi sia a ngamtat siatna hang ahi hi. 27Mihing ngilo khat in mawna a vawt sia khealin, a maan a pha a vawt le ama in ama nuntakna hu ahi hi. 28Ama in ama sep le vawtte phawkin mawna a vawt kheal ahikom ama thi ngawl a, nungta tan lai tu hi. 29Taciang no Israel mite in, ‘Vaanglianpipa TOPA sep sia maan ngawl hi ci nu hi’ na ci takpi uh ahi ziam? Noma ii zia le tong a maan ngawl hi zaw hi.

30“Tu in kei Vaanglianpipa TOPA in, no Israelte tungah hong ci khi hi. Note khat ii sim tungah na vawt uh bangin, thu kong khen tu hi. A sia a kha na vawt theampo uh nusia vun, na mawna in noma susia sak heak vun. 31A sia a kha na vawt uh theampote kheal vun a, thin thak lungthak na nei tavun. No Israel mite banghang thi nuam nu ziam? 32Kuama a thi tu dei ngawl khi hi. Na mawnate panin, kikheal vun a, nungta tavun,” Vaanglianpipa TOPA in ci hi.

0 comments:

Post a Comment