Laithiangtho Dokna (Ezekiel 19-20)

1. TOPA in Ezekiel sia Israelte kumpi tapate nii atu ___ sawl hi.  
a. khuangai la sa tu in
b. thunget sak in
c. thukhaam lai simh tu 

2. Kumhpinu in atatte sia kuate kawm ah koi kici ziam? 
a. Mihing khansiate
b. Mipilte taw
c. Tawpite kawm

3. ___ sia thikkoai zum taw Egypt ngamah kaikeak hi. 
a. Tuute
b. Silate
c. Kumhpi tapa

4. Minamte kikaikhawm aa, tawpi sia bang taw man ziam? 
a. Thaltang
b. Ngen
c. Dum sung awk sak

5. Sapit ngui sia tuikham ahikom, ___ taw kidim hi. 
a. tee le nga 
b. angaa babek
c. khuai bu

6. Angaa thiam sapit ngui sia ki___ hi. 
a. pua lai tu
b. kumhpipa atu
c. longh in kivawk

7. ___  ciang, Israel lampuite in Ezekiel kung thudongh uh hi. 
a. A haksat uh
b. TOPA in sapna angaa
c. Saltan kumh 7

8. TOPA in athiantho sak thu aphawk natu in ___ sak hi. 
a. meihal biakna vawt
b. Sabbath tang
c. kamsangte pai

9. TOPA in Israelte koisungah thalumh dektak ngei ziam? 
a. Senngeal ngam 
b. Sinai mual
c. Jordan ngun hui

10. TOPA in ___ ah athalup luang in kithethaang sak zaw hi. 
a. Sinai mual
b. Jordan ngun hui
c. senneal ngam

11. Banghunciang TOPA in a thin uukna le thahatna laktu ci ziam?
a. Sila asuak uh ciang
b. Thupha asak tu ciang
c. A khoptua kik ciang 

12. Thangsang taam ngam meikang ahal sia  ___ hi. 
a. Israelte
b. TOPA
c. A ngalte




Ezekiel 19
Khuangai La
1Israelte kumpi tapate nii atu hi khuangai la sa tu in TOPA in kei hong sawl hi:

2Na nu uh sia tawpipui taw bangza in kibang ziam!
Ama in a note sia a kiitak huai tawpi talte kawm ah khang sak hi.
3A no khat khang sak a, savai zia hil a;
mihing sa ne khat suak hi.
4Minam tatuamte in ama ii thu za in, vuum taw a sia uh hi.
Thikkoai zum taw ama sia Egypt ngamah kaikeak uh hi.
5A nu in a lametna a bo dong ngak top hi.
Tua zawkciang a no dangkhat khang sak leleau a,
tasia a kiitakhuai tawpi tal khat suak hi.
6Hong khanthin tak ciang, tawpi dangte taw kithawl in vak hi.
Ama zongh savai thiam in mihing sa ne khat suak hi.
7Ama in kulhte susia in khuapite lalcip sak hi.
Ngamsung mite sia ama hawk a zaak simin lau mama uh hi.
8Minamte in ama do tu in mun tatuam pan pai in kikhawm uh hi.
Amate in a sa siana ngen hong phal a,
tua sungah ama man uh hi.
9Kuang sungah khumin
Babylonia kumpipa kungah paipui uh hi.
Amate in ama sia Israel mual ah
a hawk a kizaak nawn ngawl natu in cing uh hi.
10Na nu sia luihui ah a kisuan sapit ngui taw kibang hi.
Tui kham ahikom, a ngui sia tee le nga taw kidim hi.
11A baakte sia takin kho a, kumpi ciangkhut hong suak hi.
A ngui in meeikaai ban tu dongin khangto a,
a kuama po in ama saang a, a tee taw kidim sia mu uh hi.
12Ahihang a thin uk khutte in a zung pan longhto in lei ah vawk uh hi.
Nisuana vui in a ngate ko sak hi.
A baakte kithiaktan a, ko in kihaltum hi.
13Tu in ama sia senneal ngamsung
tui om ngawlna lei kona ah kisuan hi.
14A ngui zikpi sia mei in kaang a,
a baakte le a ngate kaangtum hi.
A baakte bangma hun in takin kho kik ngei nawn ngawl tu a,
kumpi khawmvaan suak ngei nawn ngawl tu hi.
Hi sia khuangai la hi a; a kisa kikik la ahi hi.


Ezekiel 20
TOPA Deina le Mihing ii Nalhna
1Saltang in ka om zawk uh a kum sali kum, a tha nga, a ni sawm ni ahi hi. Israelte lampuite pawlkhat TOPA deina dongh tu in hong pai a, ka mai ah a to uh hi. 2Tua zawkciang TOPA in hong paupui hi. 3“A thi thei mihing awng, hi mihingte munah Vaanglianpipa TOPA in hi teng ci hi va ci tan. Ka deina dongh tu hong pai ahi uh ziam? A nungta Pathian ka hi bangma, kei tungah bangma thu dongh sak ngawl tu khi hi. Kei, Vaanglianpipa TOPA in kong ci zo hi.

4“A thi thei mihing awng, amate tungah thu tan tu in na kinging zo ziam?: Tua ahile thu tan in. A pu a pate ii a kiihuai ngamtatna uhte phawk sak in. 5Ka ci teng son in. Israel ka teal lai in kamciam khat ka pia hi. Amate tungah Egypt ngamah ka kilangh a, amate mun ah: Keima in TOPA na Pathian khi hi, ci khi hi. * 6Tasia lai in amate Egypt ngam pan ka pusuapui natu kamciam ka pia a, leitangh teng po pan a pha bel lei manpha ngam, amate atu ka teal sak sa ngamah paipui tu ka kamciam hi. 7A kiihuai milim a it uh te vawkin, Egyptte pathian theamte taw a kinit sak ngawl natu in thu ka pia hi, banghangziam cile Keima, TOPA na Pathian ka hi hi ci in ka son hi. 8Ahihang amate in kei hong nalh a, ka thu hong ngai bua uh hi. Amate in a kiihuai milimte vawk ngawlin Egyptte pathiante a nusia bua uh hi. Tua mun Egypt ngam ah ka thin uukna tha theampo thuak sak tu in ka kinging zo hi. 9Banghangziam cile amate tenna minamte zaakna ah Egypt ngam pan hong pusuapui tu khi hi ci in Israelte tungah thang sak zo ka hikom tabangin ka ngamta bua hi, tabangin ngamta leng keima min siatna ma hi tu hi.

10“Tua ahikom Egypt ngam pan senneal ngamah ka paipui hi. 11A zuite theampo nuntakna a pia, ka thupiakte le ka thukhamte ka hil hi. * 12Amate le kei kilaklaw thukimna lim tu in Sabbath tanna ka vawt a, keima TOPA in amate ka thiantho sakna a phawk natu ahi hi. * 13Ahihang senneal ngamsung ngangawn ah kei hong nalh uh hi. A zuite theampo nuntakna a pia ka thukham le ka thupiakte amate in paltan uh hi. Amate in Sabbath sia daicip sak uh hi. Amate senneal ngamah ka thin uukna tha theampo taw sucip tu in ka kinging zo hi. 14Ahihang Egypt ngam pan Israel mite ka pusuapui hong mu minam dangte mai ah ka mindai tu ahikom tabangin ka ngamta bua hi. 15Tua ahikom senneal ngamah kiciamna khat ka vawt a, leitangh po pan a pha bel, lei manpha, leihoi amate ka piak sa ngamah kong then nawn batu hi ci in ka kamciam hi. * 16Kiciamna ka vawt sia banghangziam cile amate in ka thupiakte nial in, ka thukhamte paltan in ka Sabbath min sia sak uh hi. Amate in milim ma bia nuam zaw uh hi.

17“Ahihang amate hesuak huai ka sa a, tua senneal ngamah thalup ngawl tu in ka khensat hi. 18Tua taangin, amate sungah khangnote kidop natu thu ka pia hi. Na pu na pate vawt thukhamte tang heak vun; amate tan ngeinate zui heak vun; tua ahibale a milimte uh taw noma na ki nin sak heak vun. 19Keima in TOPA na Pathian ka hi hi. Ka thukhamte le ka thupiakte zui vun. 20Sabbath ni thiangtho sak vun a, tua hile tasia in ih kiciam khopna lim hi tu a, taciang keima sia TOPA na Pathian ka hi hunlam hong phawk sak tu hi.

21“Ahihang tua khang kikte zongh in kei hong nalh uh hi. Amate in ka thukhamte paltan a, a zuite atu nuntakna a pia ka thupiakte a zui bua uh hi. Sabbath min a sia sak uh hi. Amate senneal ngamah ka thin uukna tha theampo taw tha tu in ka kinging zo hi. 22Ahihang Egypt ngam pan Israel mite ka pusuapui hong mu minam dangte mai ah ka mindai tu ahikom tabangin ka ngamta bua hi. 23Tua ahikom senneal ngamah kamciam dang khat ka vawt a, amate leitung theampo ah thethaang tu in ka kiciam hi. * 24Hi bang a ka hi sia banghangziam cile amate in ka thupiakte nial a, ka thukham paltan in ka Sabbath min sia sak a, a pu a pate ii biak milimte ma bia uh hi.

25“Tasia ciang thukham pha ngawlte ka pia a, nuntakna a piang sak ngawl thupiak te ka pia hi. 26A kipiak na uh taw amate ka nin sak a, a tapa upa belte zongh sangaw biakpiakna in ka pia sak hi. Hi sia sia amate ngim ka piakna hi a, Keima TOPA ka hina ka lakna ahi hi.

27“Tua ahiciang tu in a thi thei mihing awng, Israelte munah Kei, Vaanglianbel TOPA in hi bang ci khi hi. Hi sia sia a pate ii a thumaan ngawlna taw hong zawn sak vawtna nam khat ahi hi. 28Kamciam ka piakna ngamah ka paipui hi. Mualsaangte le thingkung hing te a mu uh ciang amate in tuate theampo tungah sangaw biakpiakna pia uh hi. A sangaw biakpiakna le a piak zu in kei hong thin uuk sak hi. 29Na zot uh munsaangte bang sa ka bel nu ziam?: ci in amate ka dongh hi. Tua hun pan kipan ‘Mun Saangte’ kici suak hi. 30Tu in Israel mite munah ka ci teng son in. Banghangin na pu na pate mawna teng ma maw kikik tu nu ziam? Taciang a milimte ma dedel tu nu ziam? 31Tuni dong ngangawn in na piak ngei tengma pia in, noma le noma tua milimte taw ki nin sak in, na tate uh sangaw biakpiakna in, mei sungah na hal uh hi. Tasia zawkciang no Israel mite in kei deina bang ziam? ci in dongh tu in nong pai lalai uh hi. Keima, Vaanglianpipa TOPA sia, a nungta Pathian ka hikom kei tungah thu bangma hong dongh sak nawn ngawl tu khi hi. 32Mi namdang thing le suang a biate bang suak nuamin na thin uh na khensat zo uh hi. Ahihang tabang suak ngei ngawl tu hi.

Pathian in Daan pia in Mai sak
33“Kei, Vaanglianpipa TOPA sia a nungta Pathian ka hi bangma, kidop natu thu kong pia hi. Ka thin uuk hu in ka thahat khut le ka vaangletna theampo taw kong uk tu hi. 34Na kithethaang na ngam theampo pan kong khoptua kik tak ciang ka thin uukna le ka thahatna kong lak tu hi. 35‘Ngamte ii Senneal Ngam’ a kici na ah kong paipui tu a, na maitang ah kong ningkhiin tu hi. 36Sinai senneal ngamah na pate uh ka puavawk bangin tu in kong puavawk tu hi,” Vaanglianpipa TOPA in ci hi.

37“Ngaat takin no kong uk tu a, ka thuciamna kong ni sak tu hi. 38No sung pan hong leedo theite le mi mawte ka lakeak tu hi. Tu a a tenna leitanghte panin amate ka la khia tu a, ahizong Israel ngamah ka heak kik sak batu hi. tasia ciang Kei, TOPA ka hi hunlam hong he tu uh hi,” ci hi.

39Vaanglianpipa TOPA in, “Tu in no Israel mite awng, noma uuk babangin om vun. Na milimte ma bia tavun. Ahihang kidop natu kong piak na pan, hi sia zawkciang ka thu nong nit uh kul tu a, milim biakpiakna taw ka min thiangtho na dai sak nawn batu uh hi. 40Tua ngam ka mual thiangtho Israel mualpi saang ii tungah no Israel mite theampo in kei nong bia tu uh hi. No dik kong sa tu a, taciang sangaw biakpiakna a phabelte le a thiangtho letsongte nong paipui tu ka lamen tu hi. 41Na kithethaang na ngamte panin kong tua zawkciang, na sangaw biakpiakna na halte kong saang tu a, taciang ngam tatuamte in kei a thiangtho ka hi na hong mu tu uh hi. 42Na pu na pate tungah piak tu in ka kamciam na ngam Israel ah kong ciapui kik ciang, Kei sia TOPA ka hi hunlam na he tu uh hi. 43Tasia ciang a thasiat huai na vawt uhte le noma le noma bangbangin kinin sak nu ziam ci sia na phawk kik tu uh hi. Noma le noma sia siatna na vawtte theampo hu in na kikii mama tu uh hi. 44A zatak huai ka min ka vuumsit ciangin no Israelte in Kei, TOPA ka hi sia na he tu uh hi, banghangziam cile na ngitlona na siatnate taw a kiphu in kong thuh bua hi,” Vaanglianpipa TOPA pau zo hi.

Thangsang Kaangmei
45TOPA in kei hong paupui a, 46“A thi thei mihing awng, thangsang en in. Thangsang taam ngam siat natu son khol in. 47Thangsang taam ngam tungah Vaanglianpipa TOPA ii ci teng ngai tu in sawl in: En vun! Keima in mei khat hal khi hi, tasia in na sungah a hing a ko thingkung theampo kaangtum tu hi. Bangma in tua kaangmei sia sumit zo ngawl tu hi. Tua kaangmei sia thangsang panin saksang dong kizel tu a, mihing theampo in meisa thuak tu uh hi. 48Amate in keima TOPA ii hal hi ci in a mu tu uh a, kuama in a sumit thei batu hi,” hong ci hi.

49Ahihang keima in ka nial a, “Vaanglianpipa TOPA awng, tabangin hong vawtsak heak in. Ngual theampo in kei sia tel tu a haksa kam soaiheam taw kampau hi hong ci zo hi,” ka ci hi.

0 comments:

Post a Comment