Laithiangtho Dokna (Hoshea 1-2)

1. Hosea ii pa min sia bang ziam?
a. Bersha
b. Beeri
c. Bershan

2. Hosea ii zi sia bangbangh hi ziam?
a. A meal hoi
b. Thumaan ngawl
c. Mitbum thiam

3. Hosea ii tapa lianbel sia ii min banghang Jezreel ci ziam ?
a. Lungdam ko tu adeina
b. Tualthana hang
c. Taktaai ngawl

4. Hosea ii tapa niina sia ii min khiakna sia___ ci nopna hi.
a. ci dam mama
b. it ngawl
c. ngalhang khat suak tu

5. Hosea ii tapa a thumna sia ii min khiakna sia bang ziam?
a. Kiphasak
b. Ka mi hi ngawl
c. Thupha naak

6. Judah mite le Israel mite ___tu hi.
a. ka saat vawk
b. kingawm kik
c. in ngal hau mama

7. Israelte akikheal buale a suani bangma in ___  tu hi.
a. a kap
b. a pumnguak om
c. ou kul top

8. Israel in ___kungah zuan kik nuam tu hi.
a. meihal biakna
b. apasal masa
c. thaang sungah

9. Baal biakna ah a zak vanh theampo a piapa sia ___ hi.
a. Baal
b. TOPA
c. Amate zon tawm hi tu

10. Topa in ama sia ___ah itna kammalte taw zol kik tu hi.
a. Sinai mual
b. senneal ngam sungah
c. mun nuam na ah

11. TOPA in ngalhiam theampo ka sot siat tu a, ___ah ka teangsak tu hi ci hi.
a. losung
b. ngam muanna sungah
c. Jerusalem

12. Israel awng, ___kong suaksak tu  hi.
a. christ minam khat
b. ka zi
c. mipil miciim khat

Hosea 1
1Hisia in Kumpi Uzziah, Jotham, Ahaz le Hezekiah te Judah ngamah kumpi in a maan hun le Jehoash tapa Jeroboam Israel kumpi in a maan hun a, Beeri tapa Hosea tungah TOPA ii piak thupuak ahi hi. *

Hosea ii Zi le Tate
2TOPA in Hosea tungtawn a, Israel a paupui phitbel hunin Hosea tungah, “Pai in a, zi nei in; na zi sia thumaan ngawl tu a, na tate ama banglian ma hi tu hi. Tasia bangma ka mite in kei hong nusia in, thumaan ngawl suak uh hi,” ci hi.

3Tabangin Hosea in Diblaim tanu Gomer kici numei khat tenpui hi. Amate in taciil tapa khat a nei zawkciang, 4TOPA in Hosea tungah, “A min ‘Jezreel’ phuakin, banghangziam cile Israel kumpipa ii pu Jehu ii Jezreel ah tual a thate hu in hai ngawlin Israel kumpipa daan ka pia tu hi. Jehu suan le paalte ii kumpi khang ka bo sak tu hi. * 5Tua hun ciang Jezreel Kuam ah Israel ii ngalkap thahatna ka susia tu hi,” ci hi.

6Gomer in a niina ta khat nei kik a, numei ahi hi. TOPA in Hosea munah, “A min ‘it ngawl a ci nopna’ (Lo-Ruhamah) phuak in, banghangziam cile Israel mite tungah ka itna ka lak nawn batu a a mawna ka mai sak nawn batu hi. 7Ahihang Judah mite tungah ka itna ka lak tu hi, Keima, amate Pathian TOPA in amate ka hun tu hi, ahihang ngal kisimna— namsau thal le thaltang, siphu le siphu ngalkapte ka zangh batu hi,” ci hi.

8Gomer in a tanuno noai a ten sak zawkciang ama nau paai kik a, tapa dang khat nei hi. 9TOPA in Hosea mun ah, “Na tapa min ‘Ka mi hi ngawl’ ( Lo-Ammi ) ci in phuak in, banghangziam cile Israel mite sia ka mi hi ngawl a, kei sia amate Pathian ka hi bua hi,” ci hi.

Israel Kipua kik tu
10Israel mite sia a kisim zo ngawl, a kitee zo ngawl tuipi sen bangin tam tu hi. Tu in Pathian in amate mun ah, “Note sia ka mite hi ngawl nu hi,” ci hi, ahihang ama in amate tungah, “Note sia a nungta Pathian tate na hi uh hi!” a ci ni hong theng tu hi. * 11Judah mite le Israel mite kingawm kik tu hi. Amate in amate atu lampui khat teal tu a, khatvei ma amate sia a ngam sungah khangto in nuamsa kik tu uh hi. Hi hi, Jezreel ii ni sia ni thupi ni khat hi tu hi!

Hosea 2
1Tua ahikom Israel na mipuite sia, “Pathian ii mite” le “TOPA ii it mite” ci vun.

Thumaan ngawl Gomer - Thumaan ngawl Israel
2Ama sia ka zi hi nawn ngawl a, keima sia ama pasal ka hi nawn ngawl hang, ka tate awng, na nu tungah, thuum in son vun. Ama ii palngul mawna le pumpi kizuaknate a kheal natu in son vun. 3A kheal bale a suani bangma in a pumnguak om tu in a nik a puan ka sutkeak sak tu hi. Leiko le lei kolhna mun taw kibangin ka vawt tu a, ama sia dangko in thi tu hi. 4-5A tate tungah hesuakna ka nei batu hi, amate sia a maizum maw pumpi kizuak nu ii tate ahi hi. Ama mama in, “Ka lawmpate munah ka pai tu a - amate in an le tui, samul puan le pat puan, olive thau le zu hong pia tu hi,” ci hi. *

6Tua ahikom ama sia lingdai taw ka uum tu a, a mai khaktan tu in luphung ka ciang tu hi. 7Ama in a lawmpate del tu hi, ahihang pha zo ngawl tu hi. Ama in amate zong tu a, ahihang mu ngawl tu hi. Tasia ciang ama in, “Ka pasal masa sia kungah heak kik ka tong- tua ka kiten hun lai sia tu hun sang nuam zaw ka na ve” ci tu hi.

8Ama ii Baal biakna ah a zak ngun le kham theampo le olive thau, zu le antang a pia sia keima ka hi hunlam ama in phawk ngei ngawl hi. 9Tua ahikom anlaak hun ciang ka piak sa antang le zute ka la kik tu a, taciang a silh tu ka piak samul le patpuante ka sukeak sak tu hi. 10A lawmpate mai ah a nguaktangin om tu in a puan a nikte ka sukeak sak tu a, kuama in ka khutsung pan ama suatak zo ngawl tu hi. 11Ama ii poaipi khaamnate theampo kumsim le thasim a poaite Sabbath poaite le a biakna taw kisai kikhopna dangte theampo ka bo sak tu hi. 12Amate atu in a kipiakna hu a, a lawmpate ii hong thapnate hi a ci sapit kungte le theikungte ka sia sak tu hi. Ama sapit huante le a thingnga huante duipui ka suak sak tu a, ngamsate in susia tu hi. 13Baal tungah ngimnamtui halin kizepna tatuamte taw kizeamin a lawmpate a del hun lai a kei hong makngil hu in ama daan ka pia tu hi. TOPA in son zo hi.

TOPA ii A mite A Itna
14Tua ahikom ama sia senneal ngam sungah ka pai pui kik tu a; tua munah itna kammalte taw ama ka zol kik tu hi. 15A sapit huante ama tungah ka pia kik tu a, Thinngimna Kuam sia lam etna kongkha ka suaksak tu hi. A khanmoi lai, Egypt ngam pan hong pusua lai bangma in tua munah ka thu hong ngai kik tu hi. * 16Taciang kei sia ka pasal ci in khatvei hong sam kik tu a - ama ii Baal ci in hong sam nawn ngawl tu hi. 17Baal min ka lo sak kik ngei nawn batu hi.

18Tua hun ciang ka mite a liam sak ngawl natu in ngamsate le vacimte taw thuciamna ka vawt tu hi. Ngalhiam theampo ahi, namsau le thalte zongh ngam sung panin ka sot siat tu a, ka mite sia kilemna le ngam muanna sungah ka teang sak tu hi.

19Israel awng, ka zi kong suak sak tu a;
a maan le thumaan ka hi tu hi;
A kip ki itna le hesuakna kong lak tu a,
taciang a tawntungin keima neisa kong suak sak tu hi.
20Ka kamciamte kip sak in
keima neisa kong hi sak tu hi.
taciang kei sia TOPA hi ci in nong saang tu hi.
21-22Tua hun ciang Israel ka mite ii thungetna ka zo tu hi.
Leitangh tungah ngua ka zu sak tu a,
taciang leitangh in lo an,
sapit le olive ngate piang sak tu hi.
23Ka mite tua ngamah ka teang sak tu a,
ka nuamsa sak tu hi.
“A ki it ngawl” a kicite tungah itna ka lak tu a,
taciang “Ka mi ahi ngawl” a kicite tungah,
“No sia ka mite nu hi,” ka ci tu hi.
Taciang amate in,
“Nang sia kote Pathian hi ni hi,” ci in hong zo tu uh hi. *

0 comments:

Post a Comment