Laithiangtho Dokna (Kumhpite Niina 25)

1. Zedekiah in Babylon Kumpipa Nebuchadnezzar ii khut nuai pan ___ hi.
a. tualngal tho
b. naseam
c. kilemna vawt

2. Mihingte in banghang luphung sutlet ziam?
a. Kialpi tung
b. Lau
c. Kumhpi langpan

3. Luphung sutlet ngalkapte koisang tai ziam?
a. Moab
b. Jordan kuam
c. Sinai Mual

4. Zedekiah sia bang kilaw aa, thikkol kibul in Babylon ah kicia pui ziam?
a. Thatlumh
b. Amittang khelkeak sak
c. Sila in kaai

5. Babylon Kumpipa Nebuchadnezzar ngaisut apia pa le ngalkapmangpa in biakinn ___ hi.
a. pua
b. suthamh
c. haltum

6. Judah ah mizawngteng sia bang seam tu in Babylonte na nusia ziam?
a. sila seam sak
b. ngalkap seam sak
c. Sapit huan naseam tu

7. Meikam toai na ___kuang teng zongh Babylonte in ciapui hi.
a. Ngun
b. Thiik
c. Khamh

8. Biakinn khuampi kiphutte sia pi bangza sang ziam?
a. 22
b. 19
c. 27

9. Khuamlu kiimkot simin taungo taw a kivawt __ taw kizeam hi.
a. Suangngo
b. talee nga taw
c. Tau

10 Biakinn pi ah aseam ulian bangza pha ziam?
a. 1
b. 3
c. 7

11. Israelte Babylon te ii sim athuak ciang koisung ngaltaai ziam?
a. Egypt
b. Moab
c. Syria

12. Evilmerodach sia Babylon te kumpipa a sua ciang Judah te ii Kumpipa Jehoiachin ___ hi.
a. Suataak hi.
b. that hi.
c. nasep ham seam sak hi.



Kumpite Niina 25

Jerusalem khuapi Bona

(2Khang tangthu 36:13-21; Jeremiah 52:3b-11)
1Zedekiah in Babylon Kumpipa Nebuchadnezzar ii khut nuai pan tualngal tho a, tua ahikom Nebuchadnezzar in a ngalkap hon theampo taw Jerusalem sia Zedekiah ii maan a kum kua, a tha sawm, ni sawm ni in, sim hi. Amate in khuapi pua sangah uumci na pang ciangin, * 2Zedekiah ii a ngam uk, kum sawm le kum khat a cin dong uumci hi. 3Tua kum a tha lina, a ni sawm ni in, kialpi sia nasia mama ahikom 4mihingte in khuapi luphung sulet hi. Babylonte in khuapi kiim uum ahihang ngalkapte sia zanin suakta uh hi. Amate in kumpi huan pan, luphungte nii kipeena kongpi tungtawn in, Jordan Kuam sangah tai uh hi. * 5Ahihang Babylon ngalkap honte in Zedekiah Kumpipa zuizen a, Jericho khuahui zaangtam ah manin, ama sia a ngalkapte theampo in taisan hi. 6Zedekiah sia Kumpipa Nebuchadnezzar kungah kipaipui a, ama sia Riblah ah om in, tua mun panin Zedekiah tungah thu tan hi. 7Zedekiah ii mu tangin a tapate kithatlum a; tua zawkciang Nebuchadnezzar in Zedekiah ii mittangte khelkeak sakin, thikkol bul in Babylon ah ciapui hi. *

Biakinnpi Lalthapna

(Jeremiah 52:12-33)
8Babylon Kumpipa Nebuchadnezzar ii maan a kum sawm le kum kua, a tha nga na, a ni sali ni in, Kumpipa ngaisutna a pia le a ngalkap honte ukpipa Nebuzaradan sia a ngalkapte taw Jerusalem ah tum hi. 9Ama in Biakinnpi sia haltum a, kumpi inn le Jerusalem ah mihing thupi theampo ii innte haltham hi, * 10taciang ama ii ngalkapte in khuapi luphung pheltham hi. 11Tua zawkciang Nebuzaradan in khuapi sung a om lai sun teng, thiamneal naseamte le Babylonte sangah pang tu in a taite Babylon ah ciapui hi. 12Ahihang ama in mi zawngbel teng, neisa bangma a nei ngawl teng sia Judah ah nusia in amate sia sapit huan sung le lo sungah na seam sak hi.
13Babylonte in Biakinnpi sungah taungo khuamte, leangte le taungo tuikuang le taungo vanhte theampo Babylon ah ciapui hi. * * 14Amate in kawpheak te, biaktau thian sakna vut kholna, mei-innte puana vanhte, sangaw biakpiakna sangaw ciang sachi donna kuangte, ngim namtui halna kuangte le a dang taungo taw a kivawt biakpiakna a zakte la hi. * 15Amate in kham le ngun taw a kivawt peuma, meikam toai na kuang dongin la uh hi. 16Kumpipa Solomon ii vawt taungo vanh, Biakinnpi atu— khuamngual niite, leangte, tuikuangpui— hite sia ngit lei ahikom khia kitee ngawl hi. 17Khuampi ngual nii a kiphutte sia pi 27 veu saang hi, a tung sitna sia taungo ma ahi hi, pi li pi lang saa hi. Tua khuamlu kiimkot simin taungo taw a kivawt talee nga taw kizeam hi.

Judah Mite Babylon ah Kipaipui

(Jeremiah 52:24-27)
18Tuate tungsia ah, ngalkap maangpipa Nebuzaradan in Thiampi Saang Seraiah le thiampi lianbel ii zom Zephaniah le a dang Biakinnpi a seam ulian thum teng ciapui hi. 19Khuapi sung panin ngalkap uk ulianpa le kumpipa ii aituam thudokte nga, khuapi sung a om lai teng, ngalkap ukpa ii khut dawn pa, ngalkap vai theampo tepteena keampa zongh ahi sia le a dang mihing thupi sawmluk ciapui hi. 20Nebuzaradan in amate Babylon kumpipa kungah paipui hi, ama sia Riblah khuapi ah om a, 21Hamath ngamkhen sung ahi hi. Tua munah kumpipa in vel sak a, thatlum sak hi.
Tua ahikom Judah mite sia amate ngam panin salin kiciapui hi.

Judah Ngam uk Gedaliah

(Jeremiah 40:7-9; 41:1-3)
22Babylonia te ii Kumpipa Nebuchadnezzar in Shaphan ii tupa, Ahikam ii tapa Gedaliah sia Judah ngam uk menzi in koi hi, taciang ama sia Babylonia ah a kiciapui ngawlte uk tu in koi hi. * 23Babylonia te khut sungah a tum ngawl ngalkap maangte le ngalkapte in hi thu a zaak ciang Mizpah ah ama taw kipawlna vawt uh hi. Hi ngalkap maangte sia, Nethania ii tapa Ishmael, Kareah ii tapa Johanan, Netophah khuapino pan Tanhumeth ii tapa Seraiah le Maacah pan Jezaniah te ahi uh hi. 24Gedaliah in amate tungah, “Babylonia uliante kiitak om ngawl hi ci in kam hong pia khi hi. Hi ngam sungah teang vun a, Babylonia kumpipa a tu sep sak vun, tua hile na theampo a dikin hong piang tu hi,” ci hi.
25Ahihang tua kum sung a tha salina ciang, Elishama ii tupa, Nethaniah ii tapa Ishmael, kumpi innkuante sung pan khat zongh ahi sia Mizpah ah mihing sawm taw pai a, Gedeliah simin thatlum uh hi. Ama in Israel mite le Babylonia te ama taw tua munah a om teng zongh that hi. * 26Tua zawkciang Israelte a hau a zawng, a kibangin ngalkap uliante taw tua mun nusia in Egypt ah tai uh hi, banghangziam cile amate in Babylonia te kiita uh hi. *

Jehoiachin sia Thongsung pan Kipusua

(Jeremiah 52:31-34)
27Evilmerodach sia Babylon te kumpipa a sua kumin, ama in Judahte ii Judah te ii Kumpipa Jehoiachin tungah hesuakna a lakna in thong panin ama pusuak sak hi. Hi bangin thu hong pian sia Jehoiachin ii luangtaak zawk a kum kul le sali, tha sawm le tha nii, a ni kul le ni sali ni hi. 28Evilmerodach in ama sia hesuakna pia a, ama taw Babylonia a sal a hi khawm kumpipa dangte sangin phat vawt zaw a, dinmun le upatna a lian zaw pia hi. 29Tua ahikom Jehoiachin sia a thongpuante a laih tu ki oai a, a nuntakna a taanglai sung teng kumpipa sabuai ah an kine sak hi., 30Ama ii a nuntak sung teng ni simin a zak tu sum zongh a hun zui in kipia hi.

0 comments:

Post a Comment