Laithiangtho Dokna (Micah 5-6)

1. Judah ngam pan khuapi nobel sia ii min bang  ziam?
a. Bethlehem
b. Hebron
c. Gath

2. Naupaai nu in tapa khat a nei mateng Topa in a mite ___ hi.
a. thupha pia
b. ngalte khut sungah nusia
c. it vawt ngawl hi.

3. A ma in tuute sungah tum a, ___hi.
a. an pia
b. hung
c. a bek a bekin leamtham

4. Na ngam sungah na khuapite ka ___tu  hi.
a. lalcipsak
b. lamsang
c. thiangtho sak

5. Na milimte le na biak ___ thiangthote ka sutham tu hi.
a. khui milim
b. suangkhuam
c. an

6. Ka thu ni ngawl minam theampote tungah thin uukna taw ___ tu hi.
a. ka pai
b. ka mai sak siat
c. phu ka la

7. Ama in Israel tungah bang vawt tu ziam?
a. Mawsiatna
b. Kiciamna
c. Na lamdang vawtna

8. TOPA in Moab kumhpi Balak maan lai thute ___ hi.
a. ma ngil le uk
b. phawk kik le uk
c. mai sak nuam ngawl

9. TOPA ii tangkalh thu nambangza om ziam?
a. 3
b. 2
c. 1

10. Topa kiitakna in ___na hi.
a. ciimna
b. pilna
c. thupha ngaa

11. TOPA in khaikhin le toaisuang maan ngawl a zanghte ___ hi.
a. zong
b. khialna maisak ngawl
c. kisik le uk bel

12. Na kepcing vanh papo ___ sungah ka susia tu hi.
a. khuapi
b. meikhuuk
c. ngal



Micah 5
1Jerusalem mite awng, na ngalkapte khawm vun! Eite hong kikiim uum hi! Amate in Israel lampuipa sim uh hi!

Pathian in Bethlehem pan Ukpa khat Kamciam
2TOPA in, “Bethlehem Ephrathah khua awng, nangma in Judah ngam sungah khuapi nobel khat na hi a, ahizong nang sung pan Israel a uk tu khat ka piang sak tu hi. Ama be le ngui in taangh tawng pek taw kizom hi,” ci hi. *

3Tua ahikom naupaai nu in tapa khat a nei mateng TOPA in a mite ngalte khut sungah nusia tu hi. Taciang ngamdang a peam a mipuite le a mite kingawm kik tu hi. 4Ama hong pai ciang, ama in a mite TOPA tung pan hong pai tha hatna le TOPA Pathian mama ii kumpi min taw uk tu hi. A mite ngammuang takin om tu uh hi, banghangziam cile leitungbup mihingte in ama letna tel tu a, 5ama in kilemna puak tu hi.

Kitatna le Daan piakna
Assyriate in ih ngam hong sim a, ih kulh ih taapte a kaan ciang, amate do tu in a hatbel ih lampuite ih puak tu hi. 6Ngalhiam tha hatna taw amate in Nimrod leitangh Assyria zo tu hi. Taciang Assyriate in ih ngam hong sim ciang amate in Assyriate khut sung pan eite hong hun tu hi. *

7Israel mite tua kisimna sung pan a suakta laite sia ngam tam mamate atu in TOPA piak hin kikna daaituite bang hi tu a, thingnote tung a nguazu bang hi tu hi. Amate in Pathian suang tu a, mihing suang ngawl tu hi. 8Minam tatuamte sungah a taanglai mite sia duisung ahizong, ngan thana mun ahizong, tawpi savai khat bang hi tu hi: ama in tuute sungah tum a, tuute manin a bek a bekin leamtham hi, taciang suatak natu lam-etna om ngawl hi. 9Israel in a ngalte zo siatin susia siat tu hi.

10TOPA in, “Tua hun ciang, na siphute la siatin na siphu leangte ka susia siat tu hi. 11Na ngam sungah na khuapite ka lalcip sak tu a, na kidalna theampo ka balkeak tu hi. 12Na zak uh na bum na ai theampo ka sutham tu a, khutlam en aisaan thei khat zongh ka khoaikhe batu hi. 13Na milimte le na biak suangkhuam thiangthote ka sutham tu hi; note in no mama ii vawttawm nate na bia nawn batu uh hi. 14Na ngam sungah om pathian nu Asherah milimte ka baltham tu a, na khuapite ka susia tu hi. 15Ka thu ni ngawl minam theampote tungah thin uukna lianpi taw phu ka la tu hi,” ci hi.

Micah 6
TOPA ii Israelte Thusuana
1TOPA ii Israelte thu a suana thu ngai vun.

TOPA awng tho in, na thu sung in; mualpite le mualnote in na son teng za tahen.

2No mualpite le a tawntung a kip no simlei tawdapte awng, TOPA thu ngai vun! TOPA in a mite thusua hi. Ama in Israel tungah mawsiatna khat vawt tu hi.

3TOPA in, “Ka mite awng, note tungah bang hong vawt zo khi ziam? Note atu vanh ngitpi bangbangin suak zo khi ziam? Hong zo tavun. 4Egypt ngam pan kong pusua pui hi; saltanna pan kong suatak hi; Note lam hong pui tu in Moses, Aaron le Miriam kong puak hi. * 5Ka mite awng, Moab kumpi Balak in note bang law hong sawm a, Beor tapa Balaam in bangbangin zo kik ziam cisia phawk kik vun. Acacia ngiaphual pan Gilgal paina lampi ah bangteng piang ziam cisia phawk kik vun. Hite phawk kik vun tua hile note ngum tu a ka septe tel tu nu hi,” ci hi. *

TOPA ii tangkal Thu
6Vantung Pathian TOPA bia tu ka pai ciang ama atu bangteng keng tu khi ziam? Biakpiakna a hal tu khuino phabelte keng tu khi ziam? 7Tuu tul tam mamate ahizong, tatsat ngawlin lui bang a luang Olive thaute ahizong puak leng TOPA a lungkim tu ziam? Ka khialna hu in ka tapaciil ka pia tu ziam? 8Hi ngawl hi TOPA in thupha hong son zo hi. Ama ii ei tung pan hong tangkal sia hi sia hi: thutang seam tu, ki itna kho lak tu le kiniamkhiakin ih Pathian taw kipawl khawmin nuntak tu ahi hi.

9TOPA kiitakna in ciimna hi. Ama in khuapi sam a, “No khuapi sung a kikhawm mite awng! Ngai vun! 10Mi ngilote ii inn sungah thumaan ngawlna taw a nga sumngumte om hi. Amate in ka ngaimawk khaikhin maan ngawlte zangh uh hi. * 11Bangbangin khaikhin le toaisuang maan ngawl a zanghte a khialna mai sak thei tu khi ziam? 12Na sumhaute in mizawngte dawpkang a, note theampo leeilot thusonte na hi uh hi. 13Tua ahikom, na khialna uh hangin na lalna uh le na siatna tu uh seam tu in ka kipan zo hi. 14An na neak uh hang na kham batu uh a– na ngil uh kial veve lai tu hi. Vanhte na paipui tu uh a, ahizong na keamcing zo batu uh hi. Na kepcing vanh papo ngal sungah ka susia tu hi. 15Lo an na tu tu uh a, ahihang an na la batu uh hi. Olive ngate sathau suak tu in na ngoai tu uh a, ahihang na zangh ngei batu uh hi. Zu na vawt tu uh a, ahihang na ne ngei batu uh hi. 16Hi bang hong piang tu hi, banghangziam cile note in kumpi Omri le a tapa kumpi Ahab ii ngamtat siate na zui uh hang ahi hi. Amate ngamtat ziate zomto na hi uh ciang kong siacip sak tu a, a kuama po in note hong zawngsak tu hi. Mun theampo a, om mite in note hong zawnsak vawt tu uh hi,” ci hi.

0 comments:

Post a Comment