Laithiangtho (Ezekiel 21-22)

1. TOPA in naamsau taw, akuate thalup sawm ziam? 
a. A pha taw asia taw
b. Mihing khansiate
c. Akiphasakte

2. ___ hang in Ezekiel sia mitheampo mu theina ah tau hi. 
a. Hong tung tu thu
b. Atapa thi
c. Biakinn kisuhsiat

3. TOPA in Ezekial tungah thinkiam in a awm___ sak hi. 
a. beang
b. meima vei
c. ah mul babek po

4. ___ in lampi he nuam aa, a thaltangte lok in milimte dongin nganhing ii thin en hi. 
a. Babylon kumpipa 
b. Mitbum thiamte
c. Hezekiah

5. Banghang Jerusalemte in, Babylonte ii simh tu umh ngawl ziam? 
a. Ngallem kiciamna hang
b. Topa muang
c. Haat tu umh ngawl

6. ___ ii  mu kholte a theam hi a, sonkholte sia leeilot thu hi. 
a. Ammonte
b. Assyriate
c. Babylon

7. Thukham na zui ngawl hu in hong ___ uh hi.
a. nunau
b. that lumh tu
c. siatbat 

8. Israel lampuite theampo in amate thahatna suangin ___uh hi. 
a. tual that 
b. siatna zong
c. mihing kaikhawm ngawl

9. A ___a zatak vawt, khuapi sungah kuama om ngawl hi. 
a. Pathian
b. nu a pa 
c. kumhpipa

10. A leitangh uh sia___ahikom ka thin uukna taw ngim pia tu khi hi. 
a. awlmawk ngawl
b.  thiangtho ngawl 
c. ancii taw kidim

11. Amate in a thiangtho nate le a thiangtho ngawlte ___ uh hi. 
a. kaikhawm 
b. meihal biakna pia
c. a khen bua

12. Kamsangte in hi ___ seal uh hi.
a. hai te 
b. asep thei susunte

c. mawnate

Ezekiel 21
TOPA ii Namsau
1TOPA in kei hong paupui hi. 2Ama in, “A thi thei mihing awng, Jerusalem le mite biakpiakna munte lang in mawsiat zazan in. Israel ngam tungah a kidop natu in, 3Keima, TOPA in ci khi hi; Keima na ngal ka hi hi. Ka namsau ka dok tu a, a pha taw a sia taw na vekpi in kong that siat tu hi. 4Saksang pan thangsang dong a kuama theampo tungah ka namsau kong zangh tu hi. 5Mihing theampo in Kei, TOPA in ka namsau dok zo ka hina le sot kik nawn ngawl tu ka hi sia hong he tu uh hi.

6“A thi thei mihing awng, na lungtang sung sia thin ngimna taw a tamtham bangin tau in. Mihing theampo ii hong mu theina munah khuangaina taw tau in. 7Amate in banghangin tau ni ziam hong ci ciangin, hong tung tu thu hang hi ci in. Tua hong tun tak ciang a thin uh sia launa taw hong kidim tu a, a khut uh kaikin in, a thin letna uh hong bo tu a, a khupte uh hong liing tu hi. A hun hong theng zo hi; tu hun ahi hi,” Vaanglianpipa TOPA in pau zo hi.

8TOPA in kei tungah, 9“A thi thei mihing awng, maisang thu tu sonkhol in a, mihingte tungah Kei, TOPA in bang ci khi ziam ci sia son in:

Namsau khat, Namsau khat sia kitaat a kinawt zo hi.
10Mihing tha natu in kitaat zo a,
khualeng bang a tee vazial tu in kinawt zo hi.
Thin nop natu bangma om ngawl hi,
banghangziam cile ka mite in kidop natu le
ngim piak natu theampo awlmawk ngawl hi.
11Namsau sia zak tawm thei tu in kinawt zo hi.
Mihing that pa khut sungah
a ki aap tu in kitaat hiam a, kinawt thiang zo hi.
12Thasiatna taw aukeak in,
a thi thei mihing awng, hi namsau sia keima mite tung le
Israel lampuite tungah a kizangh tu hi.
Ka mihingte theampo taw cipin amate kithatlum tu hi.
Thinkiam in na awm beang in!
13Ka mite ka sit na hi.
Amate in a kisiik kik tu a nial ahile
hite theampo amate tungah tung tu hi.
14“Tu in, a thi thei mihing awng, kam saanna son in. Na khutte beang in, tua hile namsau in saat kikik tu hi. Tua namsau sia mihing a that namsau, mihing a lau sak namsau, mihing a ngolum namsau ahi hi. 15Tasia in ka mite thinkiam sak a lutu sak hi. Amate khuapi sia a that tu in kinging a, khualeng bang a, a tee vazal namsau khat taw in ka tawng hi. 16A hiam namsau awng, na ziat na vei vaat ngawp in! Na ngatna theampo vaat ngawp in. 17Kei zongh ka khutte ka beang tu a, taciang ka thin uukna thai tu hi, Kei, TOPA in son zo khi hi,” ci hi.

Babylon Kumpipa ii Namsau
18TOPA in kei hong paupui hi. 19“A thi thei mihing awng, Babylon kumpipa a namsau taw hong pai thei natu lampi nii teptee sa in koi in. A nii ngealin, ngam khat sung panin kipan khawm tu hi. Lamkaa ah lim lakna khuam khat phut in. 20Khat in Ammonte khuapi Rabbah paina lam hi ci in Kumpipa lak tu hi, a dang khat sia in Judahte khuapi kulh taw a ki uum Jerusalem paina lak tu hi. 21Babylonia kumpipa in lamkaa, lim lakna khuam hui ah ding hi. Koi sia tawn zaw tu ci sia a tel natu in a thaltangte lok in milimte dongin a sangaw biakpiakna nganhing ii thin en hi. 22Tu in a ziatsang khut in “Jerusalem” ci in a kilak thaltang toai hi. Tua ai in a pai natu khuapite sukthap natu thingluangte taw a kithoai natu, kido na aw au tu, kongpite sutham tu, dumte to in kidalna vawt tu a hil hi. 23Jerusalem mite in hi bang piang thei tu in a um bua uh hi. Banghangziam cile ngallem kiciamna a vawt uh hang ahi hi. Ahihang son kholna in amate mawna phawk sak tu le amate sia kipum mat tu a hina kidop natu thupiakna ahi hi. 24Hi sia sia, Keima Vaanglianpipa TOPA ii ci ahi hi. Na mawnate kipholaak zo hi. Nang bangza a mawnei na hi sia a kuama po in hong he hi. Na ngamtatnate pan na mawna uh kilak hi. Nang sia nawlkhin sa hi zo na hikom nang sia na ngalte khut sungah kong aap tu hi.

25“Nang a ngilo a thiangtho ngawl Israelte lampui pa awng, na ni a khak bel ah na ngim natu ni sia hong pai hi. 26Keima, Vaanglianpipa TOPA in son zo khi hi. Na kumpi lukhu le na dialpui suut in. Khat zongh a ngeina bang hi kik nawn ngawl tu hi. Mizawngte a lian tu in laamto in: A uk miliante khiasuk in! 27Siatna, siatna vive! Hi hi, khuapi sia ka siacip sak tu hi. Ahihang khuapi daan a pia tu in ka teal pa hong pai mateng hi thu a tung batu hi. Ama tungah tua nasep ka pia tu hi.

Namsau khat le Ammonte
28“A thi thei mihing awng, kam saanna son in. Israel a zawngsak Ammonte tungah Kei, Vaanglianpipa TOPA ii ka ci teng son in. Amate munah hi bangin ci in:

Namsau khat sia a lalcip sak tu in kithoai zo hi.
Khualeng bangin a tee vazal tu le a that tu in kinawt zo hi. *
29Na mu kholte a theam hi a, na sonkholte sia leeilot thu hi. Nang sia ngilo a khan sia ni hi, taciang a khak bel na ngim nga natu ni sia hong papai laitak hi. Na ngawng ah namsau hong tu tu hi.
30“Namsau a paai sungah thun kik vun! Nang kong bitphuana mun, na pianna ngamah nang thu kong khen tu hi. 31Ka thin uukna meizang leang bangin kong tha ciang note in na phawk tu uh hi. Siatcip sak zia a thiam mihing molngolte tungah nang kong aap tu hi. 32Nang sia meikuang in hong haltham tu hi. Na chisan sia na ngam sungah kee tu a, kuama in nang hong phawk nawn ngawl tu hi;” TOPA in son zo hi.

Ezekiel 22
Jerusalem ii Mawnate
1TOPA in kei hong paupui hi. 2Ama in “A thi thei mihing awng, tual thatte taw a kidim khuapi sia tungah thukhen tu in na kinging zo ziam? A kiihuai a vawt theampo ama ii munah sonthiang in. 3Khuapi tung ah Kei, Vaanglianpipa TOPA ii ci teng son in: Na mite tam mama suamlum in nangma le nangma milim biakna taw kinin sak na hikom, na hun hong theng hi. 4Tua tual thana te tungtaang ah maw na hikom le na vawt sa milimte taw kinin sak na hikom na ni hong pai zo a, na hun hong cing zo hi. Tua hu in minam dangte in kong selno sak a, ngamdang theampo in kong nunau sak hi. 5Ngam a nainate le a khuala nate in thukham na zui ngawl hu in hong nunau uh hi. 6Israel lampuite theampo in amate thahatna suangin tual a that uh hi. 7A nu a pa a zatak vawt khuapi sungah kuama om ngawl hi. Ngamdang mite na theam uh a, meingongte le tangate tung pan hamphatna na zong uh hi. * 8Mun thiangtho te na zakta bua uh a, Sabbath na tang bua uh hi. * 9Na mite pawlkhat in midangte thi daan a thuak natu in leeilot thu na son uh hi. Pawlkhat te in milim biakna sa ne uh hi. Pawlkhat te nu le pa khialna a lungkim babangin vawt uh hi. 10Mihing pawlkhatte in a pate zi uh taw lumkhawm uh hi. Mihing pawlkhat te in numei a nin nei laitak in zawthawk thu taw a khialpui uh hi. 11Pawlkhatte in palngul mawna vawtin, pawlkhatte in a mote ahibale a suapuiseal numeite zolin khialpui uh hi. * 12Na mite pawlkhat in sum ne in tual that uh hi. Pawlkhatte in, a Israel mipuite tungah summeet pukthaakna taw hau law uh hi. Amate in kei hong mangil uh hi,” Vaanglianpipa TOPA in son zo hi. *

13“Ngual na suamlupna uh le ngual na sutolna tungah ka khuttum taw kong tumsuk tu hi. 14Na tungah kong vawt teng kong vawt siat zawkciang na khut uh lapto zawk natu in hanna ahibale hatna nei lai tu in na ki um uh ziam? Keima, TOPA in ka pau zo a, ka pau kammal bangin ka ngamta hi. 15Na mite ngam sim le minam sim sungah ka thethaang tu a, a sia na ngamtatnate ka bo sak tu hi. 16Taciang mi namdangte in no hong nomu tu a, ahihang Keima sia TOPA ka hi hunlam nong he tu uh hi,” ci hi.

Pathian ii Thiansuana Pummei
17TOPA in kei tungah, 18“A thi thei mihing awng, Israelte sia kei atu bangma mannung ngawl hi. Amate sia thik lamsang, tau, thikkaang, thik hak le ngunte a kilaak zawkciang pummei sungah a taanglai thik eakte taw kibang hi. 19Tua ahikom kei, Vaanglianpipa TOPA in amate munah, amate sia tua nate bangma in manh nei ngawl hi ka ci hi. Amate theampo Jerusalem ah ka paipui tu a, 20ngun, suang, tau, thik, hak le thikkaang te thiansakna pummei sungah a ki zotpui bangma in ka zotpui tu hi. Ka thin uukna le ka thin sona in meikuang ii nate a tuithap sak bangma in amate ka tuitham sak tu hi. 21Hi hi, Jerusalem ah amate ka khawmtua tu a, a nuai uh ah mei thut in ka thin uukna taw amate ka tuitham sak tu hi. 22Amate sia ngunte pummei sungah a tuithap bangma in, Jerusalem ah ka tuitham sak tu a, tasia ciang amate in TOPA ii thin uukna hong phawk tu hi,” hong ci hi.

Israel Lampuite ii Mawnate
23TOPA in kei hong paupui kik a, 24“A thi thei mihing awng, Israelte munah son in a, a leitangh uh sia thiangtho ngawl ahikom ka thin uukna taw ngim pia tu khi hi. 25A lampuite sia, a thalup sa nganhingte tungah a hawk tawpite taw kibang hi. Amate in mihingte that a, a sum le a neisa uh a laak thei theampo laak sakin a tual thalup hu in numei tam mama meingong suak sak uh hi. 26Thiampite in ka thukham paltan a, a thiangtho ante ciliap ngawl hi. Amate in a thiangtho nate le a thiangtho ngawlte a khen bua uh hi. Amate in na a thiangthote le a ninte kilamdanna hil ngawlin, Sabbath a ngaingon uh hi. Tua taw kizui in Israel mite in kei hong zakta bua uh hi. * 27Kumpi zum ulian seamte sia nganhing a mat sate a laitham ngiapuite taw kibang uh hi. A hau natu in amate in tual that uh hi. 28Mihingte in pang sia suangkaang tui taw a zut uh bangin kamsangte in hi mawnate seal uh hi. Amate in mu kholna a maan ngawlte mu a, son kholna maan ngawlte veu son uh hi. Amate in kei, Vaanglianpipa TOPA kampau ka lai in heang a ahihang Kei, TOPA in amate ka paupui bua hi. 29Sumhaute in ngual theamin suam uh hi. Amate in a zawngte vawtsia a, khual mite tung pan hamphatna la uh hi. 30Keima in ka thin uukna taw ka sukcip ciang kulh a cing zo tu, kulh a cipna munah ding a, a ngam a hu zo tu khat ka zong hi. Ahizong kuama ka mu zo bua hi. 31Amate ii a sia ngamtatna teng hu in ka thin uukna meikuang bangin ka pai sak tu a, ka lalcip sak tu hi,” Vaanglianpipa TOPA in son zo hi.

0 comments:

Post a Comment